Кампанія BMW запусціла ў ЗША маштабную сэрвісную кампанію, якая закранае 720 796 аўтамабіляў. Прычынай адклікання стала патэнцыйная небяспека ўзгарання: паводле даных амерыканскіх рэгулятараў, некаторыя машыны могуць загарэцца нават тады, калі рухавік не працуе, піша abw.by.
Нацыянальнае ўпраўленне бяспекай дарожнага руху ЗША (NHTSA) раіць уладальнікам да правядзення рамонту не пакідаць такія аўтамабілі ў гаражах, побач з дамамі або паблізу іншых транспартных сродкаў. На час чакання сэрвісных работ машыны рэкамендавана паркаваць на адкрытай прасторы.
Крыніца праблемы звязана з электрычным раздымам вадзяной помпы, які можа аказацца недастаткова абароненым ад вільгаці. Траплянне вады здольнае прывесці да кароткага замыкання, а ў горшым выпадку — да ўзгарання. Асаблівая ўвага да сітуацыі звязана з тым, што частку гэтых аўтамабіляў ужо адклікалі ў 2024 годзе па падобнай прычыне. Аднак, як высветлілася, ранейшыя меры не забяспечылі поўнага ліквідавання дэфекту.
Паводле інфармацыі BMW, у ЗША зафіксавана каля дзесяці інцыдэнтаў, якія могуць быць звязаны з гэтай няспраўнасцю. Пры гэтым даных пра ДТЗ або пацярпелых на дадзены момант не паступала.
У спіс трапілі аўтамабілі BMW 2012—2018 мадэльных гадоў, уключаючы мадэлі 2-Series, 3-Series, 4-Series, 5-Series, X1, X3, X4, X5 xDrive40e, Z4, а таксама 328xi Gran Turismo.
Канчатковае тэхнічнае рашэнне BMW пакуль яшчэ рыхтуе. Пасля яго зацвярджэння ўладальнікаў запросяць на бясплатны рамонт да афіцыйных дылераў. Рассылка паведамленняў павінна стартаваць 25 снежня.
Цяпер чытаюць
34‑гадовага афіцэра-ідэолага з Гродна адправілі ў калонію па палітычнай справе14
Каментары