Трэніраваць зборную Беларусі па тэнісе перакінулі спецыялістку з Федэрацыі рукапашнага бою
Стала вядома, што новым начальнікам каманды і старшым трэнерам зборнай Беларусі па тэнісе стала Валянціна Шышко. Пра гэта паведамляе Tribuna.com, адзначыўшы, што раней Шышко не мела ніякага дачынення да тэніса.
Сама Шышко расказала пра ранейшыя этапы сваёй біяграфіі, і нічога звязанага з тэнісам у яе жыцці дагэтуль не было. Раней яна працавала інструктарам-метадыстам па спартыўна-масавай і аздараўленчай працы ва ўніверсітэце фізічнай культуры. Сярод іншага працавала і ў дырэкцыі II Еўрапейскіх гульняў, якія праводзіліся ў 2019 годзе, арганізоўваючы ўзнагароджанне ўдзельнікаў на ўсіх 16 спартыўных аб'ектах.
Шышко адзначае таксама, што «адзін з цікавых напрамкаў у маёй кар'еры — праца ў сферы змешаных адзінаборстваў і MMA. У 2021 годзе мы праводзілі вялікае мерапрыемства сумесна з Бахрэйнам — турнір BRAVE».
Яна з'яўляецца членам Беларускай федэрацыі рукапашнага бою і змешаных адзінаборстваў і «часцяком прыцягваецца да арганізацыі і правядзення мерапрыемстваў з удзелам кіраўніка дзяржавы».
У сферу ж тэніса яна патрапіла, маўляў, таму, што «не любіць і не можа сядзець на месцы. Заўсёды імкнецца да нечага большага». І калі прапанавалі пайсці сюды, то «чаму не? Гэта новая сфера, новыя мэты, эмоцыі і перамогі».
Варта адзначыць, што гэта ўжо не першае «кіданне на тэніс» людзей, якія не маюць да яго аніякага дачынення. У лістападзе мінулага года Беларускую тэнісную федэрацыю ўзначаліў гандбаліст Сяргей Рутэнка.
Чытайце таксама:
Гандбаліст Сяргей Рутэнка ўзначаліў Беларускую тэнісную федэрацыю
Цяпер чытаюць
«Я больш не анархіст». Мікола Дзядок — пра турму, Бога і расчараванне ў ідэалогіях19
Каментары