Міністр абароны Украіны спрагназаваў, колькі часу расійскія войскі будуць пакідаць Херсон
Міністр абароны Украіны Аляксей Рэзнікаў мяркуе, што вывад войск з правага берага Дняпра, у тым ліку з Херсона, зойме ў Расіі не менш за тыдзень. Пра гэта ён паведаміў у чацвер вечарам у інтэрв'ю агенцтву Reuters.
Са слоў Рэзнікава, у Херсонскай вобласці — 40 тысяч расійскіх салдат, і значная частка з іх, як сцвярджае ўкраінскі міністр, знаходзіцца ў Херсоне і вакол яго на правым беразе.
«Гэта складана — вывесці гэтыя войскі з Херсона за пару дзён. Тыдзень мінімум», — сказаў Рэзнікаў, дадаўшы, што прадказваць дзеянні расіян не бярэцца.
Эксперты Амерыканскага інстытута вывучэння вайны (ISW) таксама лічаць, што «расійскае адступленне зойме яшчэ некаторы час, і па ўсёй Херсонскай вобласці будуць працягвацца баі».
Ва ўкраінскім аператыўным камандаванні «Поўдзень», у зоне адказнасці якога знаходзіцца Херсонская вобласць, паведамілі ў ноч на 11 лістапада, што Расія працягвае перамяшчаць вайскоўцаў і тэхніку паміж двума берагамі Дняпра, будуе рубяжы абароны на левым беразе і абстрэльвае пазіцыі ўкраінскіх вайскоўцаў на правым.
УСУ падчас актыўных аперацый вельмі скупа распавядаюць аб тым, што адбываецца. Адзіным указаннем на наступальную аперацыю ўкраінскіх вайскоўцаў у Херсонскай вобласці можна лічыць паведамленне аб тым, што «сілы абароны працягваюць прасоўванне лініі фронту бліжэй да левага берага», а расійскія войскі «экстранна пакуюцца ў плаўсродкі, прыдатныя для пераправы, і спрабуюць выратавацца ўцёкамі».
Увечары 10 лістапада прэзідэнт Украіны Уладзімір Зяленскі паведаміў, што на поўдні Украіны вызвалены 41 населены пункт. За які час іх вызвалілі, Зяленскі не ўдакладніў.
Азаронак напісаў пра палітэмігранта — пасля гэтага брата і бацьку таго кінулі за краты2
Каментары