16 студзеня ў судзе Бярозаўскага раёна разглядзелі яшчэ адну справу ў дачыненні да палітвязня Алега Нічыпоркі.
Гэтым разам яго абвінавацілі паводле арт. 341 і ч. 2 арт. 205 Крымінальнага кодэкса. Палітвязню дадалі да ранейшага тэрміну яшчэ паўгода зняволення. Канчатковае пакаранне Нічыпоркі — 3,5 года пазбаўлення волі ў калоніі агульнага рэжыму, паведамляе «Вясна».
У віну Алегу і яшчэ аднаму хлопцу — Івану Кату — паставілі два эпізоды: дробны крадзеж на лецішчы і надпісы на смеццевых баках ЖКГ. Справу разглядала суддзя Алена Нямкова. Ні гаспадары лецішчаў, ні ЖКГ прэтэнзій не мелі, аб чым напісалі ў заявах у суд.
Паводле блізкіх Алега Нічыпоркі, перад новым судом хлопец сказаў, што не вінаваты, але зноў будзе прызнаваць віну, а патлумачыць усё пазней. Цяпер Алег Нічыпорка знаходзіцца ў СІЗА Баранавічаў. Хлопец кажа, што яму ў СІЗА лепш, чым у калоніі.
Нагадаем, што Алега Нічыпорку ў 2022 годзе судзілі па больш як 30 эпізодах: за нанясенне пратэсных надпісаў па горадзе, расклейку лістовак, парэзаныя дзяржаўныя сцягі, а таксама псаванне ці крадзеж каля 20 камер відэаназірання ды крадзеж з лецішчаў. На першых допытах прызнаваў толькі крадзеж з лецішчаў. На судзе хлопец некалькі разоў мяняў паказанні, сведчыў пра катаванні і ціск на яго падчас утрымання пад вартай. Пазней у адным са сваіх лістоў родным Алег пісаў, што збіраецца на судзе прызнаць віну ў тым, чаго не рабіў, бо за поўнае прызнанне віны яны паабяцалі «хімію». У выніку Бярозаўскі суд тады прызначыў яму тры гады калоніі ды пастанавіў выплаціць пазоў на суму ў некалькі дзясяткаў тысяч рублёў.
Падтрымаць палітвязня можна па адрасе:
СІЗА-6. 225413, г. Баранавічы, вул. Брэсцкая, 258 В.
Алегу Георгіевічу Нічыпорку.
Цяпер чытаюць
Галоўная рэдактарка гомельскай раёнкі пакаялася за тое, што абвінаваціла гурт «Дразды»7
Каментары