«Мы былі часткай СССР, рэспублікай, так, але бяспраўнай».
Прэзідэнт Азербайджана Ільхам Аліеў заявіў, што разглядае знаходжанне рэспублікі ў складзе Расійскай імперыі і СССР як каланіяльны перыяд, піша Moscow Times.
«Мы былі каланізаваныя ў XIX стагоддзі. Потым знаходзіліся ў складзе Савецкага Саюза, дзе не мелі незалежнасці. Мы былі часткай СССР, рэспублікай, так, але бяспраўнай. У нашай гістарычнай памяці захавалася разуменне таго, што значыць быць калоніяй, а потым стаць свабоднай дзяржавай», — сказаў Аліеў на IV Шушынскім глабальным медыяфоруме.
Паводле яго слоў, у савецкія гады з Азербайджана «вывозіліся мільярды тон нафты», аднак пасля распаду СССР краіна сутыкнулася з дэфіцытам электраэнергіі і дагэтуль вымушана ліквідаваць экалагічную шкоду, нанесеную інтэнсіўнай здабычай нафты.
Аліеў таксама адзначыў, што пасля 1991 года многія ў Расіі прадказвалі хуткі крах былых саюзных рэспублік, спасылаючыся на іх няздольнасць самастойна забяспечваць сябе, аднак гэтыя прагнозы не спраўдзіліся.
«Усе яны жывуць нармальным жыццём», — сказаў ён, дадаўшы, што сам Азербайджан за 30 гадоў незалежнасці ператварыўся ў «сярэднюю дзяржаву».
Адказваючы на пытанне пра Украіну, Аліеў зноў паўтарыў, што яна не павінна згаджацца на акупацыю, і падкрэсліў, што Азербайджан нязменна падтрымлівае яе тэрытарыяльную цэласнасць.
Падобныя ацэнкі савецкага перыяду Аліеў выказвае не ўпершыню. Раней ён называў уваходжанне Азербайджана ў склад СССР вынікам акупацыі і сцвярджаў, што гэта перашкодзіла рэспубліцы стаць паўнавартаснай дэмакратычнай дзяржавай.
Пры гэтым у савецкія гады Азербайджанскую ССР доўгі час узначальваў бацька цяперашняга прэзідэнта Гейдар Аліеў: з 1969 да 1982 года ён быў першым сакратаром ЦК Кампартыі рэспублікі, а затым да 1987 года займаў пасаду першага намесніка старшыні Савета Міністраў СССР.
Каментары
Цалкам адрозніваецца ад калоніі макуртастана лукі дзе манкурт лука не мае ўласнай гісторыі, а падведзена ўсе пад патрэбы і погляды мацквы.