У Беларусі працягваюць прадаваць з аўкцыёнаў маёмасць былога палітвязня і святара Генрыха Акалатовіча. 2 ліпеня павінны былі прайсці таргі па продажы яго зямельнага ўчастка ў вёсцы Новая Мыш Баранавіцкага раёна. Аднак аўкцыён не адбыўся ўжо чацвёрты раз запар — ахвотных набыць участак зноў не знайшлося. У той жа час тры старажытныя абразы, якія належалі святару, былі прададзеныя, піша «Брэсцкая вясна».
Кожны з абразоў выстаўляўся на асобны аўкцыён, і ў кожным выпадку ўдзельнічаў толькі адзін купец, які пагадзіўся на набыццё.
Паводле падлікаў, за тры абразы ў бюджэт паступіць 4620 рублёў. Найстарэйшы з прададзеных абразоў датуецца XVIII стагоддзем.
Ксяндза Генрыха Акалатовіча затрымалі ў канцы 2023 года. Яго прызналі вінаватым у «здрадзе дзяржаве» і асудзілі да 11 гадоў пазбаўлення волі. У лістападзе 2025 года святар выйшаў на волю пасля памілавання, пасля чаго быў высланы за межы Беларусі. Пасля гэтага яго маёмасць працягваюць прадаваць праз аўкцыёны.
Цяпер чытаюць
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч36
Каментары