З арт-студыяй і інтэрактыўнай спартыўнай сцяной. У Мінску адкрываецца новы дзіцячы садок
Новы дзіцячы сад №584 адкрываецца ў Заводскім раёне 30 чэрвеня. Дзяцей там пачнуць прымаць з 4 ліпеня.

Садок будзе на вуліцы Міркоўскага, 4. Ён разлічаны на 210 дзяцей, як расказала агенцтву «Мінск-Навіны» загадчыца дашкольнай установы Марына Шчавель. У будынка яркі фасад і абсталяваная дваровая тэрыторыя: ёсць спартыўныя і гульнявыя пляцоўкі для дзяцей розных узростаў.
«Унутры ва ўстанове знаходзіцца басейн. У нас адкрываецца свой камп'ютарны клас і арт-студыя. Разыначка сада — інтэрактыўная сцяна ў спартыўнай зале. Таксама будзе працаваць кабінет псіхолага», — расказвае Шчавель.
Па словах загадчыцы, новая ўстанова дашкольнай адукацыі вельмі запатрабаваная. Побач — жылы комплекс «Малая радзіма», дзе пражывае шмат шматдзетных сем'яў.
Ужо 4 ліпеня садок пачне прымаць дзяцей.
Каментары