Амерыканская актрыса з фільма жахаў «Званок» памерла ва ўзросце 35 гадоў
Самая вядомая роля Дэйві Чэйз — у фільме жахаў «Званок», яна таксама агучвала дзяўчынку Ліла ў мультфільме «Ліла і Сціч».
Актрыса Дэйві Чэйз памерла ў аўторак ад ускладненняў, выкліканых менінгітам. Ёй было ўсяго 35 гадоў.
Пра смерць Чэйз выданню TMZ паведаміў яе бойфрэнд Рой Эрнандэс, які на гэтым тыдні стварыў старонку GoFundMe для збору сродкаў на падтрымку хворай актрысы.
«У Дэйві дыягнаставалі менінгіт і некалькі сур'ёзных інфекцый крыві. Яе стан стаў крытычным, і дактары сказалі мне, што ёй, магчыма, засталося нядоўга жыць», — напісаў ён.
Паводле Эрнандэса, інфекцыя крыві выклікала сэптычныя ўскладненні і прывяла да адмовы органаў.
Дэйві Элізабет Чэйз нарадзілася 24 ліпеня 1990 года ў Лас-Вегасе. Сваю кар'еру дзіцячай актрысы яна пачала ў сямігадовым узросце, здымаючыся ў рэкламе і выступаючы на сцэне.
Пачала здымацца з васьмі гадоў — «Сабрына», «Маленькая ведзьма», «Зачараваныя», «Хуткая дапамога».
Сапраўдны прарыў адбыўся ў 2002 годзе, калі яна агучыла Ліла ў мультфільме «Ліла і Сціч». Пасля Чэйз працягвала агучваць гераіню ў сіквелах і тэлесерыяле, які выходзіў у 2003—2006 гадах.
У 2002 годзе Дэйві знялася ў хіце жанру жахаў «Званок» Гора Вербінскі, які потым здыме «Піратаў Карыбскага мора».
Вы, напэўна, памятаеце яе гераіню — Самару Морган — доўгавалосую дзяўчынку ў белай сукенцы са смяротнымі звышнатуральнымі здольнасцямі — яна стала самым пазнавальным персанажам фільма. За гэтую ролю Чэйз атрымала ўзнагароду MTV Movie Award як найлепшая зладзейка.
Пасля ўдзелу ў некалькіх праектах у сярэдзіне 2010‑х гадоў Чэйз у значнай ступені адышла ад акцёрскай дзейнасці.
Рой Эрнандэс згадваў пра цяжкасці, з якімі яна сутыкнулася ў жыцці, у тым ліку пра здзекі, канфлікты з сям'ёй і праблемы са здароўем.
Каментары