«Кітай павінен паслаць Лукашэнку адпаведны сігнал». У Польшчы дапускаюць закрыццё чыгуначных пераходаў з Беларуссю
Польшча гатовая пры неабходнасці закрыць і чыгуначныя пераходы з Беларуссю. Пра гэта Польскаму прэс-агенцтву (РАР) заявіў намеснік міністра ўнутраных спраў і адміністрацыі Польшчы Мацей Вонсік.
Паводле слоў чыноўніка, Польшча і Літва ўжо ўзгаднілі механізм прыняцця рашэння аб закрыцці аўтамабільных пераходаў. Да яго павінна далучыцца і Латвія. Але таксама Вонсік выказаў гатоўнасць абмежаваць рух і праз чыгуначныя пераходы. На яго думку, гэта падстава для Кітая падаць выразны сігнал беларускім уладам.
«Мы разумеем, што большая частка гандлю, у тым ліку польскага, ідзе праз іх. Кітайскі гандаль таксама ідзе. Думаю, што Кітай павінен паслаць Лукашэнку адпаведны сігнал, каб не рабіў дзеянняў, ад якіх яны пацярпяць», — сказаў намеснік міністра.
Вонсік адзначыў, што, паводле даных польскага боку, у Беларусі знаходзяцца ад 3,5 да 5 тыс. баевікоў ПВК «Вагнер». На яго думку, хоць яны і небяспечныя, але гэта не тое падраздзяленне, якое ўвойдзе ў Польшчу і пачне вайну, але іх могуць выкарыстоўваць для гібрыдных дзеянняў, правакацый на мяжы з агнястрэльнай зброяй, узмацнення міграцыйнага ціску і г. д.
Таксама чыноўнік паведаміў, што на ўзмацненне памежнай аховы будуць накіраваныя яшчэ 2 тысячы польскіх вайскоўцаў, а не тысяча, як меркавалася раней.
Чыгуначныя пасажырскія перавозкі паміж Беларуссю і Польшчай адсутнічаюць яшчэ з 2020 года, захоўваецца толькі грузавое спалучэнне.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім12
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3333
Каментары