Таямнічы выбух у Азярышчы. «Байпол» прапанаваў сваю версію здарэння на станцыі пагрузкі вайсковай тэхнікі
Афіцыйных тлумачэнняў таго, што выбухнула на чыгуначнай станцыі Азярышча пад Мінскам познім вечарам 5 кастрычніка дагэтуль няма.
Раней паведамлялася, што выбух адбыўся каля 23:20 на станцыі ў раёне радыёцэнтра ці чыгуначных пуцей, а чуваць яго было за восем кіламетраў ад эпіцэнтра.
Кіраўнік «Байпола» Аляксандр Азараў сцвярджае, што сабраныя яго арганізацыяй даныя дазваляюць зрабіць выснову, што на станцыі Азярышча КДБ правяраў боегатоўнасць і рэагаванне на надзвычайную сітуацыю МУС і спецслужбаў.
У памяшканнях чыгуначнікаў яшчэ да выбуху заселі прадстаўнікі КДБ, якія пільнавалі будучае месца здарэння.
Паводле версіі «Байпола», вайсковец-падрыўнік заклаў выбухоўку так, каб яна не пашкодзіла чыгуначнае палатно і каб выбух не прывёў да спынення руху. Так яно і сталася.
Як паведаміла 6 кастрычніка «Супольнасць чыгуначнікаў Беларусі» выбухнула паміж 4 і 6 каляінамі. Магутнасць выбухоўкі ацэньвалася як даволі высокая, але асабліва сур'ёзных пашкоджанняў інфраструктуры не было. Наступствы не прывялі да затрымкі цягнікоў.
Азараў кажа, што па выбуху ўсе вайсковыя часці, размешчаныя паблізу, а таксама спецслужбы былі ўзнятыя па трывозе.
Непадалёк ад станцыі ва Уруччы дыслакуецца 120-я гвардзейская асобная механізаваная брыгада, у аграгарадку Калодзішчы — 127-я брыгада сувязі, а ў Мінску — 56-ты полк сувязі.
Далей былі абвешчаныя ў вышук тры чалавекі: бацька і два сыны. Іх імёны Азараў устрымліваецца называць.
Адзін з сыноў на 2021 год быў курсантам Вайсковай акадэміі. Ён мог быць «падрыўніком». Са слоў кіраўніка «Байпола», не ўстаноўлена, каб вайсковец быў звязаны з КДБ.
Дагэтуль, аднак, няма інфармацыі аб затрыманні падазраваных, хаця іх асобы сілавікам вядомыя.
«Мы праверылі па сваіх каналах мабільныя тэлефоны дваіх мужчын (сыноў). Яны не выключаліся, хаця мінула тры тыдні, і за гэты час тэлефоны меліся разладавацца», — адзначае Азараў, з чаго робіць выснову, што тыя мужчыны дагэтуль у Беларусі.
Ён робіць выснову, што «падазраваных» маглі і не шукаць альбо, зняволіўшы, адпусціць, не паведамляючы пра затрыманне. Калі КДБ рыхтуе такія вучэнні, то можа прыцягваць вайскоўцаў і міліцыю.
«За 20 гадоў службы пра такія вучэнні я ніколі не чуў», — прызнаецца Азараў.
Кіраўнік «Байпола» звязвае іх правядзенне з цяперашняй сітуацыяй у краіне і вакол яе. Ён згадвае акцыі рэйкавых партызанаў і дыверсію ў Мачулішчах, а таксама бясконцыя вучэнні вайсковых падраздзяленняў і сіл тэрытарыяльнай абароны пасля таго, як пачалася поўнамаштабная вайна Расіі супраць Украіны.
«Лагічна, што КДБ вырашыў правесці вучэнні якраз для МУС і паназіраць, як яно будзе рэагаваць на сітуацыю з падрывам чыгункі», — дапускае Азараў.
Ён таксама заўважае, што за тры тыдні «рэжым не ўсклаў віны за дыверсію ні на «змагароў», ні на «заходнія спецслужбы». Раней пра тое заяўлялася з дэманстраваннем затрыманых. А гэта сведчыць на карысць версіі аб вучэннях.
«Белпол» са спасылкай на свае крыніцы паведамляў, што ў ноч з 6 на 7 кастрычніка сілавікі меліся ўзмоцнена ахоўваць чыгунку, што міліцыянты ўсіх падраздзяленняў выйдуць на дзяжурства з аўтаматамі.
Увечары 6 кастрычніка чытачы «Нашай Нівы» паведамілі, што на чыгуначных станцыях у Мінску і вакол сталіцы ходзяць узброеныя патрулі міліцыянтаў.
Пра абвяшчэнне ў вышук траіх мужчын стала вядома з паведамленняў у чатах чыгуначнікаў і аўтамабілістаў. Там жа публікаваліся і іхнія фотаздымкі.
Тэлеграм-канал «МатолькаПамажы» са спасылкай на свае крыніцы пісаў 6 кастрычніка, што «з самай раніцы абвешчана ў вышук па ўсёй краіне некалькі мужчын, якія могуць быць датычныя да выбуху на станцыі Азярышча».
Сцвярджалася, што на працягу першага дня па здарэнні прадстаўнікі сілавых ведамстваў пастаянна знаходзіліся ў будынку ўпраўлення БЧ і Цэнтра кіравання перавозкамі (ЦКП) і апытвалі работнікаў службы перавозак, дыспетчараў і іншых работнікаў, звязаных з рухам цягнікоў.
Пасля 8 кастрычніка здарэнне на станцыі Азярышча больш не згадвалася.
Месяцам раней адбылася гісторыя з перакрываннем чыгуначнага руху пад Талачыном. Паводле «Супольнасці чыгуначнікаў», 4 верасня цягнікі спынялі ў абодвух напрамках на ўчастку даўжынёю каля 45 км. У раёне Талачына была чуваць ці то страляніна, ці то выбухі сігнальных петардаў.
Чыгуначнікі дапусцілі, што здарэнне магло быць звязана з засакрэчаным перамяшчэннем па чыгунцы вайсковага кантынгенту, тэхнікі або боепрыпасаў. Афіцыйна пра яго не паведамлялася.
Аднак 12 верасня дзяржаўныя каналы паказалі фільм, у якім Камітэт дзяржбяспекі абвінаваціў у працы на СБУ пяцярых жыхароў Беларусі, а таксама затрымаў украінца, які, як сцвярджаецца, ладзіў тайнікі са зброяй у прымежных раёнах. Спецслужбісты заяўлялі, што схопленыя мужчыны рыхтавалі дыверсію на чыгунцы ў Талачынскім раёне.
«Наша Нiва» — бастыён беларушчыны
ПАДТРЫМАЦЬГлядзіце таксама:
МУС: На Белчыгунцы здзейснена больш за 80 «тэрактаў»
Чым Лукашэнка можа адказаць на дыверсію ў Мачулішчах?
Ці змірыўся Захад з тым, што Беларусь у лапах Расіі, і якія выбары рыхтуе Лукашэнка?
Халезін: Неўзлін фінансуе Хартыю'97 яшчэ з прэзідэнцкіх выбараў 2010 года39
Каментары