Tajamničy vybuch u Aziaryščy. «Bajpoł» prapanavaŭ svaju viersiju zdareńnia na stancyi pahruzki vajskovaj techniki
Aficyjnych tłumačeńniaŭ taho, što vybuchnuła na čyhunačnaj stancyi Aziaryšča pad Minskam poźnim viečaram 5 kastryčnika dahetul niama.
Raniej paviedamlałasia, što vybuch adbyŭsia kala 23:20 na stancyi ŭ rajonie radyjocentra ci čyhunačnych puciej, a čuvać jaho było za vosiem kiłamietraŭ ad epicentra.
Kiraŭnik «Bajpoła» Alaksandr Azaraŭ śćviardžaje, što sabranyja jaho arhanizacyjaj danyja dazvalajuć zrabić vysnovu, što na stancyi Aziaryšča KDB praviaraŭ bojehatoŭnaść i reahavańnie na nadzvyčajnuju situacyju MUS i śpiecsłužbaŭ.
U pamiaškańniach čyhunačnikaŭ jašče da vybuchu zasieli pradstaŭniki KDB, jakija pilnavali budučaje miesca zdareńnia.
Pavodle viersii «Bajpoła», vajskoviec-padryŭnik zakłaŭ vybuchoŭku tak, kab jana nie paškodziła čyhunačnaje pałatno i kab vybuch nie pryvioŭ da spynieńnia ruchu. Tak jano i stałasia.
Jak paviedamiła 6 kastryčnika «Supolnaść čyhunačnikaŭ Biełarusi» vybuchnuła pamiž 4 i 6 kalainami. Mahutnaść vybuchoŭki aceńvałasia jak davoli vysokaja, ale asabliva surjoznych paškodžańniaŭ infrastruktury nie było. Nastupstvy nie pryviali da zatrymki ciahnikoŭ.
Azaraŭ kaža, što pa vybuchu ŭsie vajskovyja čaści, raźmieščanyja pablizu, a taksama śpiecsłužby byli ŭźniatyja pa tryvozie.
Niepadalok ad stancyi va Uruččy dysłakujecca 120-ja hvardziejskaja asobnaja miechanizavanaja bryhada, u ahraharadku Kałodziščy — 127-ja bryhada suviazi, a ŭ Minsku — 56-ty połk suviazi.
Dalej byli abvieščanyja ŭ vyšuk try čałavieki: baćka i dva syny. Ich imiony Azaraŭ ustrymlivajecca nazyvać.
Adzin z synoŭ na 2021 hod byŭ kursantam Vajskovaj akademii. Jon moh być «padryŭnikom». Sa słoŭ kiraŭnika «Bajpoła», nie ŭstanoŭlena, kab vajskoviec byŭ źviazany z KDB.
Dahetul, adnak, niama infarmacyi ab zatrymańni padazravanych, chacia ich asoby siłavikam viadomyja.
«My pravieryli pa svaich kanałach mabilnyja telefony dvaich mužčyn (synoŭ). Jany nie vyklučalisia, chacia minuła try tydni, i za hety čas telefony mielisia razładavacca», — adznačaje Azaraŭ, z čaho robić vysnovu, što tyja mužčyny dahetul u Biełarusi.
Jon robić vysnovu, što «padazravanych» mahli i nie šukać albo, źniavoliŭšy, adpuścić, nie paviedamlajučy pra zatrymańnie. Kali KDB rychtuje takija vučeńni, to moža pryciahvać vajskoŭcaŭ i milicyju.
«Za 20 hadoŭ słužby pra takija vučeńni ja nikoli nie čuŭ», — pryznajecca Azaraŭ.
Kiraŭnik «Bajpoła» źviazvaje ich praviadzieńnie ź ciapierašniaj situacyjaj u krainie i vakoł jaje. Jon zhadvaje akcyi rejkavych partyzanaŭ i dyviersiju ŭ Mačuliščach, a taksama biaskoncyja vučeńni vajskovych padraździaleńniaŭ i sił terytaryjalnaj abarony paśla taho, jak pačałasia poŭnamaštabnaja vajna Rasii suprać Ukrainy.
«Łahična, što KDB vyrašyŭ pravieści vučeńni jakraz dla MUS i panazirać, jak jano budzie reahavać na situacyju z padryvam čyhunki», — dapuskaje Azaraŭ.
Jon taksama zaŭvažaje, što za try tydni «režym nie ŭskłaŭ viny za dyviersiju ni na «zmaharoŭ», ni na «zachodnija śpiecsłužby». Raniej pra toje zajaŭlałasia z demanstravańniem zatrymanych. A heta śviedčyć na karyść viersii ab vučeńniach.
«Biełpoł» sa spasyłkaj na svaje krynicy paviedamlaŭ, što ŭ noč z 6 na 7 kastryčnika siłaviki mielisia ŭzmocniena achoŭvać čyhunku, što milicyjanty ŭsich padraździaleńniaŭ vyjduć na dziažurstva z aŭtamatami.
Uviečary 6 kastryčnika čytačy «Našaj Nivy» paviedamili, što na čyhunačnych stancyjach u Minsku i vakoł stalicy chodziać uzbrojenyja patruli milicyjantaŭ.
Pra abviaščeńnie ŭ vyšuk traich mužčyn stała viadoma z paviedamleńniaŭ u čatach čyhunačnikaŭ i aŭtamabilistaŭ. Tam ža publikavalisia i ichnija fotazdymki.
Telehram-kanał «MatolkaPamažy» sa spasyłkaj na svaje krynicy pisaŭ 6 kastryčnika, što «z samaj ranicy abvieščana ŭ vyšuk pa ŭsioj krainie niekalki mužčyn, jakija mohuć być datyčnyja da vybuchu na stancyi Aziaryšča».
Śćviardžałasia, što na praciahu pieršaha dnia pa zdareńni pradstaŭniki siłavych viedamstvaŭ pastajanna znachodzilisia ŭ budynku ŭpraŭleńnia BČ i Centra kiravańnia pieravozkami (CKP) i apytvali rabotnikaŭ słužby pieravozak, dyśpietčaraŭ i inšych rabotnikaŭ, źviazanych z rucham ciahnikoŭ.
Paśla 8 kastryčnika zdareńnie na stancyi Aziaryšča bolš nie zhadvałasia.
Miesiacam raniej adbyłasia historyja ź pierakryvańniem čyhunačnaha ruchu pad Tałačynom. Pavodle «Supolnaści čyhunačnikaŭ», 4 vieraśnia ciahniki spyniali ŭ abodvuch napramkach na ŭčastku daŭžynioju kala 45 km. U rajonie Tałačyna była čuvać ci to stralanina, ci to vybuchi sihnalnych pietardaŭ.
Čyhunačniki dapuścili, što zdareńnie mahło być źviazana z zasakrečanym pieramiaščeńniem pa čyhuncy vajskovaha kantynhientu, techniki abo bojeprypasaŭ. Aficyjna pra jaho nie paviedamlałasia.
Adnak 12 vieraśnia dziaržaŭnyja kanały pakazali film, u jakim Kamitet dziaržbiaśpieki abvinavaciŭ u pracy na SBU piaciarych žycharoŭ Biełarusi, a taksama zatrymaŭ ukrainca, jaki, jak śćviardžajecca, ładziŭ tajniki sa zbrojaj u prymiežnych rajonach. Śpiecsłužbisty zajaŭlali, što schoplenyja mužčyny rychtavali dyviersiju na čyhuncy ŭ Tałačynskim rajonie.
«Naša Niva» — bastyjon biełaruščyny
PADTRYMAĆHladzicie taksama:
MUS: Na Biełčyhuncy ździejśniena bolš za 80 «teraktaŭ»
Čym Łukašenka moža adkazać na dyviersiju ŭ Mačuliščach?
Ci źmiryŭsia Zachad z tym, što Biełaruś u łapach Rasii, i jakija vybary rychtuje Łukašenka?
Minčuki rasčaravanyja salutam na Dzień horada — šmat kamientaroŭ2
Kamientary