На расійскім рудніку «Піянер», дзе пад заваламі апынуліся 13 шахцёраў, спынілі выратавальную аперацыю
Гэта звязалі з рызыкай паўторнага абвалу і затапленнем усіх гарызонтаў шахты, дзе маглі знаходзіцца людзі.
Выратавальная аперацыя на рудніку «Піянер» у Амурскай вобласці спынена. Там гэта звязалі з рызыкай паўторнага абвалу і затапленнем усіх гарызонтаў шахты, дзе маглі знаходзіцца людзі, піша Бі-бі-сі.
У шахце рудніка на глыбіні больш за 100 метраў пад заваламі 18 сакавіка апынуліся 13 горнарабочых.
Ратавальнікі прасвідравалі некалькі свідравін, каб разведаць сітуацыю. 25 сакавіка МНС Расіі заявіла, што апушчаная ў свідравіну камера знайшла ваду. Яшчэ раней — аб тым, што руднік з высокай верагоднасцю затоплены.
Свідравіны, прасвідраваныя на рудніку, паказалі што ўсе гарызонты, дзе маглі быць людзі, затопленыя вадой, глінай і лёдам, заявілі зараз у адміністрацыі рудніка.
На мінулым тыдні быў затрыманы і арыштаваны дырэктар рудніка Аляксей Бірукоў. Яго абвінавачваюць у парушэнні патрабаванняў бяспекі пры здзяйсненні прац (арт. 216 КК РФ).
Яшчэ на мінулым тыдні ТАСС пісаў, што большая частка аварыйна-выратавальных работ на рудніку «Піянер» прыпынена. «Прыпыненыя ўсе працы, уключаючы свідраванне чацвёртай свідравіны, з-за рухомасці грунта. Захоўваецца рызыка паўторнага прарыву пароды», — казала крыніца агенцтва.
Каментары