У гэты момант на тэрыторыі Расіі на мяжы з Беларуссю гарыць лес, і цалкам верагодна, што ён можа перакінуцца і на тэрыторыю нашай краіны.
«Службовыя асобы дзяржлесаховы адразу некалькіх лясгасаў Магілёўскай вобласці прымаюць меры па недапушчэнні пераходу агню ў лясны фонд з боку Расіі», — паведамляе тэлеграм-канал Міністэрства лясной гаспадаркі.
Паводле аператыўнай інфармацыі, пад ударам знаходзіцца Панькоўскае лясніцтва Касцюковіцкага лясгаса. Да беларускай мяжы ад месца пажару каля 1 кіламетра.
Дзяржлесахова Касцюковіцкага лясгаса, як паведамляецца, адразу ж выехала да мяжы. Дадаткова туды накіраваныя сілы і рэсурсы з суседніх Клімавіцкага і Чэрыкаўскага лясгасаў. У цэлым сітуацыю на мяжы кантралююць 15 работнікаў дзяржлесаховы і 6 адзінак тэхнікі.
Па стане на 31 сакавіка ў лясным фондзе Мінлясгаса ў гэтым годзе ўжо адбылося 15 выпадкаў лясных пажараў на плошчы 9,7 га.
Каментары