Генконсульства Беларусі ў Растове-на-Доне будзе адказваць за акупаваныя тэрыторыі Украіны
Беларусь адкрые там генконсульства да 1 ліпеня.
У консульскую акругу Генеральнага консульства Беларусі ў Растове-на-Доне ўвойдуць Валгаградская і Растоўская вобласці РФ, а таксама акупаваныя тэрыторыі Данецкай, Луганскай, Запарожскай, Херсонскай абласцей Украіны, Крым і ўкраінскі горад Севастопаль.
Пра гэта было заяўлена сёння на сустрэчы губернатара Растоўскай вобласці Васіля Голубева з паслом Беларусі ў РФ Дзмітрыем Крутым на ПМЭФ-2024, паведамляе прэс-служба ўрада расійскага рэгіёну, піша Reform.news.
«Васіль Голубеў праінфармаваў Дзмітрыя Крутога аб тым, што ўжо вызначана памяшканне для Генеральнага консульства Рэспублікі Беларусь у Растове-на-Доне. Консульская акруга будзе ўключаць тэрыторыі ДНР, ЛНР, Рэспублікі Крым, Валгаградскай, Запарожскай, Растоўскай, Херсонскай абласцей і Севастопаля», — гаворыцца ў паведамленні.
Раней паведамлялася, што Беларусь адкрые генконсульства ў Растове-на-Доне да 1 ліпеня 2024 года. Яно будзе адкрыта на базе існуючага ў горадзе аддзялення пасольства Беларусі ў Расіі. Такім чынам рэжым Лукашэнкі ідзе на новае абвастрэнне адносін з Украінай, афіцыйна прызнаючы ўключэнне ў РФ акупаваных украінскіх тэрыторый.
Каментары