Як зарабляць на YouTube пасля адключэння манетызацыі ў Беларусі? Гэта цалкам магчыма
Для больш-менш папулярных блогераў манетызацыя Google ніколі не была асноўнай крыніцай даходу. Ёсць схемы, якія прыносяць болей грошаў — сабралі самыя папулярныя з іх.
Прамая рэклама
Самы відавочны спосаб заробку. Кампанія плаціць вам за рэкламу ў роліках, але не ад ютуба. Такія відэа мусяць мець у сабе тэкст «відэа ўтрымлівае ў сабе рэкламу».
Прадукт-плэйсмент
Звычайна ў такім выпадку выкарыстоўваюцца тавары таго, хто плаціць, і яны мусяць быць інтэграваныя ў відэа. Ідэя ў тым, каб выклікаць жаданне купіць прадукт проста зараз, але больш тонка, чым з прамой рэкламай — улюбёны блогер быццам і сам захапляецца ці проста карыстаецца таварамі брэнда.
Напрыклад, блогер можа быць у адзенні нейкага брэнда (і між іншым заўважыць, што ў таго выйшла новая калекцыя) або есці ў кадры прадукт ад брэнда.
Спонсарства
У гэтым выпадку кампанія ці брэнд плаціць за кантэнт, які звычайна прадугледжвае выкарыстанне ці дэманстрацыю ў відэа прадукцыі або атрыбутыкі брэнда, але «між іншым». Прамой рэкламы ў такіх відэа няма. Напрыклад, Red Bull фінансуе многіх блогераў, якія займаюцца экстрэмальным спортам, а расійскі «Авіясэйлс» — трэвел-блогераў ды стэндапераў.
Такі від рэкламы накіраваны найперш на павышэнне пазнавальнасці брэнда агулам. Такая форма больш актуальная для буйных блогераў, але і параўнальна невялікія могуць разлічваць на грошы ад меншых брэндаў.
Данаты
Нягледзячы на тое, што вывесці сродкі з Patreon у Беларусь цяпер няпроста, ёсць расійскія аналагі — напрыклад, Boosty. Таксама можна прасіць ахвяраванні проста на картку.
Партнёрскі маркетынг
У гэтым выпадку блогер прадае нешта па сваім прамакодзе. Напрыклад, вы рэкламуеце адукацыйныя курсы ці тавары. Калі чалавек іх купляе па вашым прамакодзе, то адсотак ад продажу ідзе вам.
Продаж уласных тавараў ды паслуг
Таксама блогеры могуць прадаваць нешта самі. Гэта можа быць як прадукцыя з лога канала ці калекцыі адзення ад блогераў, гэтак і розныя курсы ды трэнінгі. У многіх блогераў у Расіі ды за мяжой гэта асноўны бізнэс, а рэклама з ютуба ў маштабах прыносіць няшмат.
Стварыць новы акаўнт AdSense у іншай краіне
Гэта не вельмі проста, але магчыма. Шмат расейцаў, да прыкладу, каб абысці правілы Google, ствараюць ІП у Грузіі і рэгіструюць «грузінскі» AdSense. Тое самае можна зрабіць і праз Казахстан ды іншыя краіны, якія дазваляюць беларусам без праблем адкрываць ІП ці кампаніі ў гэтых краінах.
Рэч у тым, што забароны Google распаўсюджваюцца не на пашпарт уладальніка, а на рэгіён, дзе ён фармальна знаходзіцца. Ёсць шмат сэрвісаў, якія робяць такія акаўнты «пад ключ».
«Наша Нiва» — бастыён беларушчыны
ПАДТРЫМАЦЬ
Каментары