«Людзі саромеліся, што прыехалі. Яшчэ і кантракт на год падпісваеш». Блогеры расказалі пра закуліссе кастынгу на праўладнае рэаліці-шоу

Сярод настаўнікаў-блогераў праекта заяўлены Улад Кабякоў, Яўген Анегін і Вольга Бузава.

А натхняльнік конкурсу — Анатоль Ісачанка, старшыня Магілёўскага аблвыканкама.

На вочны этап кастынгу ў Магілёў запрасілі больш за 100 чалавек. Сярод іх былі як нікому невядомыя персоны з сотняй падпісчыкаў, так і блогеры з мільённымі ахопамі. 

Вольга Краўчук, якая мае 45 тысяч падпісчыкаў у інстаграме і 7 тысяч у тыктоку, падзялілася, што яе здзівіла: на кастынгу былі людзі, якія саромеліся таго, што прыйшлі на такі конкурс.

— Яны нават не распавядалі пра гэта ў сацыяльных сетках. Не сказалі родным, куды едуць. Вельмі дзіўна, што яны не могуць прызнацца на публіку, ім сорамна, што яны паехалі на кастынг.

Сама яна не прайшла на «Фабрыку блогераў», але крыўдаў на журы не мае.

@baby_kravchuk #могилев #беларусь #кастинг #брест ♬ оригинальный звук - Кравчук Ольга

Многія папулярныя блогеры (а сярод іх ёсць і тыя, чыя аўдыторыя ў інстаграме і тыктоку складае каля мільёна падпісчыкаў) сапраўды ці ўвогуле маўчалі пра свой удзел у кастынгу, ці прысвячалі гэтаму некалькі сторыс.

Яшчэ адна блогерка ў сваім канале расказала пра ўмовы ўдзелу ў праекце, якія шмат каго ўразілі.

— Вельмі жорсткі кантракт — гэта мяне здзівіла. Кантракт ты падпісваеш на год і цэлы год ты павінна рэкламаваць спонсараў (трэба зрабіць 24 рэкламы). Гэта мясакамбінат, малочная прадукцыя, шмат усяго… Магілёўскія прадпрыемствы. Я такая: ашалець. Кожнаму ўдзельніку ганарар 2 тысячы рублёў. І за гэтыя 2 тысячы ты павінна год рабіць рэкламу.

Дзве тысячы ўдзельнікам плацяць за 10 дзён удзелу ў праекце. Рэкламу дадаткова не аплачваюць. Але ёсць галоўны прыз, якія атрымае пераможца — 20 тысяч рублёў.

Зразумела, што такая прапанова нявыгадная для блогераў, якія маюць дзясяткі, а то і сотні тысяч падпісчыкаў. Некаторыя з іх адзначалі, што зняць 24 рэкламы для блога — гэта даволі вялікі аб'ём працы. Зарабіць на такой колькасці рэкламы яны могуць у разы больш. Людзі абураліся тым, што арганізатары адразу не паведамілі пра такую ўмову, бо інакш папулярныя блогеры б «1000 разоў падумалі, ці варта ісці на кастынг».

Для параўнання: нядаўна беларуская блогерка (яна не ўдзельнічала ў кастынгу), якая мае каля 150 тысяч падпісчыкаў у інстаграме, прадала месяц рэкламы ў сваіх сторыс за 10 тысяч рублёў.

Дзяўчына-канкурсантка распавяла, што для ўдзелу ў праекце адабралі 10 асноўных удзельнікаў і 5 запасных на той выпадак, калі нехта адмовіцца ці кагосьці выганяць (з запаснымі кантракты таксама падпісваюць). Яна сцвярджае, што адзін чалавек ужо адмовіўся ад прапанаванага месца.

Цікава, што паўдзельнічаць у «Фабрыцы блогераў» захацелі нават не ўсе праўладныя блогеры. Напрыклад, Наталля Капусціна са Жлобіна, якая мае 55 тысяч падпісчыкаў у тыктоку, расказала, чаму нават заяўку падаваць не стала.

— Я паглядзела людзей, якія будуць там: Анегін, Бузава, Кабякоў. Мяне гэта адштурхнула. Я чакала, што ў складзе каманды будзе хаця б нехта з прафесіяналаў — прафесійны журналіст, шоўмен… Ну нехта.

@nostalliak

♬ оригинальный звук - КапустинаНаталья

Праўладная блогерка прызналася, што Яўгена Анегіна, які будзе сярод настаўнікаў праекта, яна ўвогуле заблакавала праз тое, што ён стварае фэйкі.

— Я заблакавала яго і адпісалася пасля таго, як пабачыла фэйкавую навіну пра тое, што ў Жлобіне адкрыўся новы гандлёвы цэнтр. І гэтая навіна ўзбударажыла людзей, бо ў мяне потым усе пыталіся: «Капусціна, што ў вас там новае ў Жлобіне адкрылася такое крутое і цікавае?»

Здымкі рэаліці-шоу «Фабрыка блогераў» пройдуць з 22 па 30 снежня.

• 1
• 0
• 9
• 7
• 1
• 0
• 0
• 0