«Гэтая крама — мой адзіны бізнэс». Што гавораць работнікі гандлёвага цэнтра, які на тым тыдні згарэў у Віцебску
Ужо тыдзень уся краіна абмяркоўвае пажар, які ўспыхнуў у віцебскім ГЦ «Беларусь» у пятніцу, 13 снежня. Паводле папярэдніх звестак, яго прычынай стала кароткае замыканне. У бальніцы да гэтага часу знаходзяцца дзевяць пацярпелых, а сам будынак, хутчэй за ўсё, пойдзе пад знос. У найбліжэйшы час арандатары змогуць трапіць усярэдзіну ГЦ, каб забраць адтуль ацалелыя тавары. Выданне Office Life пагаварыла з тымі людзьмі, якія працавалі там да пажару.
Уладальніца крамы «Хатні тэкстыль» Наталля Якушэвіч кажа, што выйшла з будынка, які загарэўся, адной з першых. Яе крама была ў левым крыле, а пажар узнік у правым. Наталля спадзяецца, што агонь да яе крамы не дабраўся, але як моцна пацярпеў тавар ад гару і дыму, яна пакуль не ведае. На момант размовы ў будынку ГЦ яшчэ ішлі следчыя дзеянні і ўсярэдзіну арандатараў не пускалі.
У краме прадаваліся фіранкі, карнізы, спадарожныя тавары. І гэта быў адзіны гандлёвы пункт Наталлі. Ёй, як і многім іншым арандатарам, прапанавалі пераехаць у іншыя аб'екты ўласніка ГЦ. Як удакладнялі раней, пацярпелым прадпрымальнікам паабяцалі даць ільготныя тарыфы па арэндзе памяшканняў.
Уладальніцы крамы жаночага адзення Orchid Наталлі пашанцавала менш: яе гандлёвы пункт знаходзіўся ў самым пацярпелым правым крыле будынка. Як і ў многіх іншых прадпрымальнікаў, яе тавар не быў застрахаваны, а крама была адзіным бізнэсам.
У адміністрацыі ГЦ Наталлі ўжо паабяцалі кампенсацыйную выплату, але ці пакрые яе памер страты, невядома. Сама яна на гэта надзей не мае і пакуль не будуе планаў па аднаўленні бізнэсу.
Алена працуе прадаўцом у «МайстарВік», гэта камп'ютарная крама, яка ў асноўным займаецца рамонтам тэхнікі. Яна знаходзілася на другім паверсе гандлёвага цэнтра, недалёка ад лесвіцы, па якой давялося эвакуявацца наведвальнікам і работнікам.
У павільёне плошчай 27 квадратных метраў займаліся ў асноўным рамонтам камп'ютараў і ноўтбукаў, запраўкай картрыджаў, продажам спадарожных аксесуараў. Усё абсталяванне, у тым ліку і тое, якое прынеслі на абслугоўванне кліенты, засталося ўнутры.
Алена таксама ўжо запісалася ў спісы тых, хто хоча пераехаць у іншыя ГЦ горада — «Кантынент», «Мега», «Планета».
Крама дзіцячых тавараў Babyonline таксама была адзіным аб'ектам Кацярыны Алініцкай. Тут прадаваліся дзіцячыя цацкі і гульні. Пасля пачатку пажару тавар разам з дакументамі застаўся ў цэнтры.
У каментары мясцовай тэлекампаніі прадпрымальніца пасля сустрэчы з уладамі горада адзначала, што многія пытанні нарэшце праясніліся. Напрыклад, стала зразумела, што ёй вернуць грошы за арэнду, бо «засталіся без грошай, без працы, а Новы год хутка».
Аляксандр Кватуненка адкрыў сваю краму тавараў «Спорт плюс» у 2017 годзе. Для яе ён зняў памяшканне на першым паверсе ГЦ «Беларусь». На адным паверсе з ім крама іншага прадпрымальніка «Усё для рыбалкі».
Ніхто з іх, як, зрэшты, і іншыя арандатары, свае тавары не страхаваў, а таму разлічваць ім прыйдзецца толькі на тыя сумы, якія яны атрымаюць ад адміністрацыі ГЦ, а таксама на вяртанне грошай за арэнду.
Пасля пажару ў віцебскім гандлёвым цэнтры МНС прапануе зрабіць больш строгімі правілы бяспекі для гандлёвых цэнтраў. Зараз праводзяць маніторынг ГЦ па ўсёй Беларусі.
Назва ад кінатэатра, выгляд ад аўтара віцебскай піраміды, на верхнім паверсе — дзеці. Што вядома пра гандлёвы цэнтр, які гарэў у Віцебску
У бальніцах Віцебска застаюцца дзевяць пацярпелых пры пажары ў ГЦ «Беларусь»
Сярод затрыманых па справе пажару ў віцебскім гандлёвым цэнтры, верагодна, ягоны ўладальнік
Затрымалі падазраваных у парушэнні пажарнай бяспекі ў ГЦ «Беларусь» у Віцебску
ГЦ «Беларусь» у Віцебску, дзе быў моцны пажар, падумваюць знесці
Як выглядае ўнутры гандлёвы цэнтр у Віцебску пасля пажару ФОТЫ
«Некаторыя віцябляне паводзілі сябе вельмі годна». Сведкі пажару ў гандлёвым цэнтры падзяліліся ўражаннямі
Каментары