Зяленскі: Лукашэнка прапаноўваў мне стукнуць па Мазырскім НПЗ, я яму кажу: «Што ты гаворыш?»
Прэзідэнт Украіны Уладзімір Зяленскі расказаў у інтэрв'ю амерыканскаму падкастару Лексу Фрыдману, што Аляксандр Лукашэнка прасіў у яго прабачэння ў першыя дні нападу Расіі на Украіну.
«У першыя дні вайны Лукашэнка прасіў прабачэння і казаў, што не вінаваты ў тым, што з тэрыторыі ягонай краіны запускаюць ракеты», — сказаў Зяленскі.
Прэзідэнт Украіны распавёў, што размаўляў з Лукашэнкам па тэлефоне праз некалькі дзён пасля пачатку поўнамаштабнага расейскага ўварвання ў лютым 2022 года. Лукашэнка, са слоў Зяленскага, прасіў прабачэння і запэўніваў, што не мае дачынення да таго, што Пуцін выкарыстаў Беларусь для нападу на Украіну.
«Ён казаў, што «гэта не я, з маёй тэрыторыі пускаў ракеты Пуцін». Гэта яго словы, у мяне ёсць сведкі. Ён прасіў прабачэння, ён казаў: «Павер, Валодзя, гэта не я, я яму казаў, не трэба, гэта было без мяне», — сцвярджае Зяленскі.
Прэзідэнт Украіны сказаў, што Лукашэнка нібыта прапаноўваў яму адказаць ударам па беларускім НПЗ.
«Я яму [Лукашэнку] сказаў, што ён такі ж забойца, а ён мне сказаў: «Зразумей, нельга ваяваць з рускімі». Кажу яму: «Як ты дапусціў?» Ён кажа: «Ну добра, стукні па НПЗ, ты ж ведаеш, як ён шмат для мяне значыць». Я яму кажу: «Што ты гаворыш?» — распавёў Зяленскі.
Прэзідэнт Украіны даў трохгадзіннае інтэрв'ю для амерыканскага падкаста. Ён расказаў пра ўкраінскае бачанне справядлівага міру, вытокі расійскай агрэсіі і гатоўнасць працаваць разам з прэзідэнтам Трампам і ўсімі партнёрамі дзеля ўсталявання трывалага міру.
Зяленскі адказваў у асноўным на ўкраінскай мове праз перакладчыка, хоць часам выкарыстоўваў рускія словы і не саромеўся ў выразах.
«Ну гэта х**ня, прабачце», — сказаў Зяленскі пра адмову Захаду ўвесці прэвентыўныя санкцыі супраць Расіі і забяспечыць Украіну зброяй перад поўнамаштабным уварваннем у лютым 2022 года.
Таксама ён заявіў, што Украіна згодная прыпыніць агонь у выпадку, калі ёй дадуць зброю для адбіцця будучых нападаў.
Хто тая прафсаюзная актывістка з МАЗа, якая папрасіла Лукашэнку разабрацца ў ютубе з «беглымі»?18
Каментары