У Хабараўскім краі выпаў з дзявятага паверха чыноўнік, які крытыкаваў расійскую армію
У расійскім Хабараўскім краі знайшлі мёртвым супрацоўніка адміністрацыі горада Нікалаеўск-на-Амуры. Ён упаў з дзявятага паверха, паведаміла дзяржаўнае агенцтва ТАСС.
Па словах суразмоўцы агенцтва, раней чыноўнік негатыўна выказваўся на адрас расійскіх вайскоўцаў, праз што стаў фігурантам крымінальнай справы аб публічных закліках да экстрэмізму. Яму пагражала да пяці гадоў пазбаўлення волі.
Паводле звестак тэлеграм-канала Mash, загінулы — 44-гадовы Арцём Прымак. Да гэтага ён запісаў відэа з прабачэннямі. У кадры чыноўнік, запінаючыся і перакручваючы словы, зачытвае па паперы, што «заклікаў у інтэрнэце да забойства расіян, якія ўдзельнічаюць у спецыяльнай ваеннай аперацыі на тэрыторыі Украіны». Таксама Прымак заявіў, што публікаваў адпаведныя каментары «пад уплывам праўкраінскіх медыярэсурсаў».
Паведамляецца, што гэта было ў 2023 годзе, а яшчэ раней, у маі 2022-га, чыноўніка судзілі «за дэманстрацыю свастыкі ў сацсетках» — тады яму прызначылі штраф у памеры 1000 рублёў.
5 лютага Расфінманіторынг унёс Прымака ў рэестр «тэрарыстаў і экстрэмістаў». Канал таксама апублікаваў вытрымку з нібыта перапіскі чыноўніка з блізкімі. Паводле гэтай інфармацыі незадоўга да смерці ён адправіў ім сваё фота і прасіў «запомніць яго такім».
5 лютага нечым падобны выпадак адбыўся ў Санкт-Пецярбургу, дзе трагічна загінуў 59-гадовы ўральскі бард Вадзім Стройкін. Ён выкінуўся з 10-га паверха ў той час, калі ў кватэры, у якой мужчына жыў, праводзілі ператрус па пытанні нібыта зробленых ім данатаў на Узброеныя сілы Украіны.
У кватэру Стройкіна прыйшлі шасцёра сілавікоў з двума панятымі, але ператрус скончыўся нечакана. Падчас яго музыка адпрасіўся на кухню, каб выпіць вады, і пасля гэтага жывым яго не бачылі. Затое пад сцяной 17-павярховіка, у якім ён жыў, знайшлі мёртвае цела.
Цяпер чытаюць
Што вядома пра Максіма Палянскага і Мікалая Свірыдава — беларускіх альпіністаў, якія зніклі ў гарах Кыргызстана4
Каментары
Легше діяти по путінськи: отруїти новічком, викинути з вікна, зарізати в підворотні...