Палубісак з Радашковічаў згінуў на вайне: гэта заняло пару тыдняў
24‑гадовы наёмнік назаўсёды застаўся пад Краматорскам.
Сям’я шукае апошнія сляды юнака Аляксандра Палубіска, які згінуў без вестак у Краматорскім раёне Украіны. Неўзабаве яму магло б быць 26 гадоў, але, бадай што, ніколі не будзе.
Па інфармацыі Belpol, Аляксандр Палубісак нарадзіўся ў гарадскім пасёлку Радашковічы Маладзечанскага раёна, за 30 км ад Мінска. Яго маці — настаўніца, а бацька працаваў у кампаніі па аптовым продажы будаўнічых матэрыялаў. Жанчына не раз выклікала міліцыю пасля яго п’яных скандалаў. У бацькі ёсць і судзімасць за нясплату аліментаў.
Пасля школы Аляксандр вучыўся ў Мінскім гарадскім машынабудаўнічым каледжы.
Палубісак знік з Беларусі 22 верасня 2025 года. Праз некалькі месяцаў родныя звярнуліся з заявай у Следчы камітэт — маўляў, прапаў у невядомым кірунку. І тады Палубіска аб’явілі ў вышук.
Аднак кірунак, як аказалася, быў даволі прадказальны. Малады хлопец паехаў зарабіць грошай на вайне. Між яго знікненнем у Беларусі і канчатковым знікненнем на полі бою прайшло паўтара месяца.
Аляксандр «Беларус» Палубісак атрымаў статус зніклага без вестак 10 лістапада 2025 года. Яго жыццё скончылася на тэрыторыі Краматорскага раёна Украіны.
Каментары