У нямецкім Мюнстэры затрымалі 45-гадовага беларуса, які ўчыніў пярэпалах на плошчы Брэмерплац, якая знаходзіцца каля галоўнага чыгуначнага вакзала горада. Пра гэта паведамляе мясцовая паліцыя, піша выданне «Беларусь и мир».
Здымак ілюстрацыйны. Фота: нямецкая паліцыя
Інцыдэнт адбыўся 20 лютага ў 17.12 вечара. Па словах відавочцаў, мужчына раптам напаў на мінакоў. Пасля таго як супрацоўнік службы аховы грамадскага парадку паспрабаваў адвесці хулігана ўбок, той накінуўся з кулакамі і на яго.
Тады ахоўнік паклікаў калег. Разам яны павалілі парушальніка на зямлю і выклікалі паліцэйскіх. Тыя арыштавалі беларуса.
Цяпер за агрэсіўныя паводзіны яму пагражае крымінальная справа, у тым ліку за значны супраціў праваахоўнікам.
Каментары