«Мы будзем адказваць на ўсе ўдары з боку Расіі». Зяленскі адрэагаваў на заяву Крамля пасля перамоў з ЗША
Прэзідэнт Украіны Уладзімір Зяленскі пракаментаваў заяву Крамля пасля перамоў Уладзіміра Пуціна з Дональдам Трампам, спыніўшыся перадусім на спробах Пуціна аслабіць Украіну ў вайсковым сэнсе, піша Украінская служба «Радыё Свабода».
«Пуцін бярэ адчувальную тэму, падымае тэму мабілізацыі. Што за гэтым стаіць — мабілізацыяй, зброяй? Паслабленне ўкраінскай арміі. Пытанне не ў мабілізацыі, а ў тым, каб колькасны склад арміі зменшыўся. Гэты ўльтыматум быў у пачатку вайны», — сказаў ён у размове з журналістамі.
Што тычыцца разведкі і зброі, то, па словах Зяленскага, Пуцін бачыў, што ЗША могуць рабіць такія крокі і таму ён парушае тое, «што можа спрацаваць».
«Гэта зноў паслабленне арміі. Гэта значыць уся гульня яго — каб нас максімальна аслабіць… Я лічу, што нашы партнёры не прымуць патрабаванне спыніць узбройваць Украіну, таму што гэта аслабіць нашу пазіцыю», — дадаў ён.
Зяленскі мяркуе, што Пуцін не дазволіць атрымаць спыненне агню хутка, ён заваліць Украіну ўмовамі — цяпер ёсць прапанова спыніць удары па энергетычных аб'ектах, гэта можа быць спосабам прасунуцца да спынення агню.
«Пры пасярэдніцтве ЗША Расія і Украіна могуць дамовіцца не біць па інфраструктуры адзін аднаго. Але не можа быць і гаворкі пра тое, што Расія працягвае гэта рабіць, і чакаецца, што Украіна гэтага не будзе рабіць. Мы будзем адказваць на ўсе ўдары з боку Расіі, калі мы не будзем уцягнутыя ў гэтае пагадненне. Мы гатовыя прытрымлівацца гэтага пагаднення, калі яно будзе дасягнута і падтрымана ЗША», — дадаў ён.
У той жа час Зяленскі некалькі разоў адзначыў, што яму яшчэ невядомыя дэталі перамоў Дональда Трампа і Уладзіміра Пуціна.
Увечары 18 сакавіка Трамп і Пуцін правялі амаль двухгадзінныя тэлефонныя перамовы. Па паведамленні Белага дома, яны пагадзіліся, што рух да міру пачнецца з «энергетычнага і інфраструктурнага спынення агню, а таксама тэхнічных перамоў па ўкараненні марскога перамір'я ў Чорным моры, поўнага спынення агню і ўстанаўлення пастаяннага міру».
У Крамлі сцвярджаюць, што Пуцін падтрымаў ідэю Трампа аб месячным мараторыі на ўзаемныя ўдары па энэргетычнай інфраструктуры — «станоўча адгукнуўся на гэтую ініцыятыву і адразу даў расійскім вайскоўцам адпаведную каманду».
У той жа час Пуцін, як паведамляе Крэмль, пазначыў «шэраг істотных момантаў», якія тычацца кантролю за спыненнем агню на ўсёй лініі баявога сутыкнення, а таксама выказаўся пра неабходнасць «спынення прымусовай мабілізацыі» ва Украіне і пераўзбраення УСУ. Таксама расійскі прэзідэнт назваў «ключавой умовай для недапушчэння эскалацыі» поўнае спыненне замежнай вайсковай дапамогі і абмену разведвальнай інфармацыяй з Кіевам.
Каментары