Інжынерка з Германіі Міхаэла Бентхаус, якая пакутуе на параліч ног, здзейсніла гістарычны палёт у космас на ракеце New Shepard кампаніі Blue Origin. 20 снежня яна правяла 10 хвілін на вышыні 104 кіламетры над Зямлёй, стаўшы першым чалавекам у інвалідным вазку, які перасягнуў мяжу атмасферы.
Міхаэла атрымала траўму хрыбта сем гадоў таму пасля аварыі на горным веласіпедзе, але не адмовілася ад мары аб космасе.
Рэалізаваць гэтую задуму ёй дапамог былы топ-інжынер SpaceX Ганс Кёнігсман. Пасля таго як Міхаэла напісала яму ў інтэрнэце з пытаннем аб магчымасці такога палёту, Кёнігсман не толькі падтрымаў яе, але і часткова спансаваў місію, адправіўшыся ў космас разам з ёй у якасці пасажыра.
Space is for everyone. pic.twitter.com/OUs4V2LURA
Для палёту Blue Origin дапрацавала наземнае абсталяванне: з люка капсулы высоўвалася спецыяльная лаўка, дзякуючы якой Бентхаус змагла самастойна перасесці з каляскі ў крэсла астранаўта. Кампанія падкрэсліла, што гэтая місія стала важным крокам да таго, каб зрабіць космас даступным для кожнага.
Новы кіраўнік NASA Джарэд Айзекман павіншаваў Міхаэлу, адзначыўшы, што ейны прыклад натхняе мільёны людзей ва ўсім свеце.
Каментары