Міністэрства юстыцыі Расіі 13 сакавіка ўключыла ў рэестр «замежных агентаў» прафесарку Ніну Хрушчову — праўнучку колішняга першага сакратара ЦК КПСС Мікіты Хрушчова. Яна жыве ў ЗША і працуе ў Новай школе ў Нью-Ёрку.
Ніна Хрушчова нарадзілася ў 1963 годзе ў Маскве, скончыла філалагічны факультэт МДУ, а ў пачатку 1990‑х пераехала ў ЗША, дзе жыве дагэтуль. Яна неаднаразова крытыкавала ўлады Расіі, асуджала анексію Крыма і развязаную Расіяй вайну ва Украіне.
У інтэрв’ю Кацярыне Гардзеевай у лютым Хрушчова назвала перадачу Крыма Украінскай ССР у часы кіравання яе прадзеда «менеджарскім» рашэннем прэзідыума Вярхоўнага Савета СССР і выказала меркаванне, што гэта было зроблена для «прывязкі» Украіны да Расіі.
Дэпутат Дзяржаўнай думы ад анексаванага Крыма Міхаіл Шарамет заявіў тады, што словы Хрушчовай прамоўленыя «ў духу здраднікаў Расіі».
Каментары
Чэкісты - маньякі, якія апантаныя помствай.