«Я пажартаваў». Коўл пракаментаваў словы, што не ведаў, дзе Беларусь
Спецпасланнік прэзідэнта ЗША па Беларусі заявіў, што пажартаваў, калі сказаў, што не ведаў, дзе знаходзіцца наша краіна, калі адміністрацыя Дональда Трампа ўпершыню накіравала яго ў Мінск з афіцыйным візітам. Так Коўл пракаментаваў свае словы, сказаныя раней у некалькіх інтэрв’ю амерыканскім СМІ, заўважыла «Люстэрка».
«Дык што, Джон Коўл быў намеснікам спецпрадстаўніка па канфлікце паміж Расіяй і Украінай і не ведаў, дзе знаходзіцца Беларусь? Вы жартуеце? Спадзяюся, ён хаця б зможа знайсці Маскву на карце», — напісала карыстальніца сацсеткі X Nšo-či.
У адказ на гэта Джон Коўл напісаў, што гэта быў жарт.
«Гэта быў жарт. Вядома, я ведаў, дзе знаходзіцца Беларусь», — напісаў спецпасланнік Трампа.
Пра тое, як ён да візіту ў Мінск нібыта не ведаў, дзе знаходзіцца Беларусь на карце, Джон Коўл публічна расказваў як мінімум два разы. Першы — выданню The Wall Street Journal у снежні 2025 года.
У сваім аповедзе пра сустрэчы з Аляксандрам Лукашэнкам у Мінску спецпрадстаўнік адзначыў, што не быў самым відавочным кандыдатам для дыпламатычнай місіі ў Беларусі.
«Першае, што я падумаў: дзе гэта, чорт пабяры?» — успамінаў ён.
Другі раз Коўл паўтарыў гэтую фразу за тыдзень да свайго апошняга візіту ў Мінск у сакавіку 2026 года, выступаючы ў Інстытуце Маккейна ў Вашынгтоне. Ён расказаў аўдыторыі, як увогуле атрымаў пасаду спецпасланніка і як прайшла яго першая паездка ў Мінск.
«Усё пачалося з тэлефоннага званка… У той час я быў намеснікам пасланніка па канфлікце паміж Расіяй і Украінай генерала [Кіта] Келага. Мне тэлефануюць: «Паедзеш у Беларусь?» Я пытаюся: «А дзе гэтая Беларусь?»» — распавёў Коўл.
Варта зазначыць, што за чатыры паездкі былога 78‑гадовага амерыканскага адваката ў Беларусь удалося вызваліць 438 чалавек.
«Лукашэнка любіць лаяцца матам, ты лаешся ў адказ. А гарэлку я выліваў на падлогу». Коўл распавёў пра візіты ў Мінск
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты
«Трэба сесці і размаўляць». Коўл заявіў пра неабходнасць дыялогу паміж Беларуссю і Літвой на ўзроўні міністраў
«Працуем над гэтай мэтай». Джон Коўл адказаў на ліст Кацярыны Андрэевай
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек3
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2323
Каментары