Трамп заявіў, што адмяніў новы ўдар па Іране па просьбе лідараў Катара, ААЭ і Саудаўскай Аравіі
Перамовы працягваюцца.
Прэзідэнт ЗША Дональд Трамп заявіў, што адклаў новы ўдар па Іране, які планаваўся на аўторак, па просьбе лідараў Катара, Саудаўскай Аравіі і ААЭ, паколькі «цяпер вядуцца сур’ёзныя перамовы», піша Бі-бі-сі.
«Падчас сур’ёзных перамоваў эмір Катара Тамім бін Хамад Аль Тані, наследны прынц Саудаўскай Аравіі Мухамед бен Салман і прэзідэнт ААЭ шэйх Мухамед бін Заід Аль Нахаян папрасілі мяне адкласці нашу атаку на Іран, якая была запланавана на заўтра», — напісаў Трамп у сваёй сацсетцы Truth Social.
Трамп паведаміў, што яго праінфармавалі пра магчымасць заключэння здзелкі, якая будзе «цалкам прымальнай» для ЗША, і дадаў: «ІРАН НЕ ПАВІНЕН МЕЦЬ ЯДЗЕРНАЙ ЗБРОІ!»
«З павагі да гэтых лідараў я даручыў кіраўніку Пентагона Піту Хегсэту, старшыні Аб’яднанага камітэта начальнікаў штабоў Дэну Кейну і ўзброеным сілам ЗША не наносіць удар па Іране заўтра. Але таксама я загадаў ім быць гатовымі неадкладна пачаць поўнамаштабнае наступленне на Іран, калі прымальнага пагаднення не будзе», — растлумачыў Трамп.
Ён падкрэсліў, што пагадненне павінна гарантаваць адсутнасць у Ірана доступу да ядзернай зброі.
Іран пакуль публічна не пракаментаваў апошнюю заяву Трампа.
Паведамленні пра тое, што ЗША і Ізраіль нібыта рыхтуюцца аднавіць ваенную кампанію супраць Ірана, з’явіліся ў апошнія дні на фоне больш жорсткай рыторыкі Трампа. Раней ён пагражаў Тэгерану аднаўленнем удараў, заявіўшы, што «для Ірана гадзіннік цікае, і ім лепш паспяшацца, інакш ад іх нічога не застанецца».
Выданне Axios са спасылкай на высокапастаўленую крыніцу ў кіраўніцтве ЗША паведамляла, што калі Іран не зменіць сваю пазіцыю, ЗША будуць вымушаныя працягваць перамовы «пры дапамозе бомбаў».
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты4
Каментары