Украінскія атакі на расійскія НПЗ сталі больш эфектыўнымі дзякуючы новай тактыцы
Украіна змяніла падыход да ўдараў па энергетычнай інфраструктуры Расіі. Замест масаваных атак цяпер робіцца стаўка на дакладныя ўдары па найбольш уразлівых элементах нафтаперапрацоўчых заводаў. Пра гэта піша Financial Times са спасылкай на вайскоўцаў і спецыялістаў, якія ўдзельнічаюць у падрыхтоўцы такіх аперацый.
Паводле інфармацыі выдання, новая тактыка дазваляе выводзіць прадпрыемствы са строю на больш працяглы час, што ў выніку робіць аднаўленне больш дарагім і складаным для Расіі.
Аператары ўкраінскіх беспілотнікаў расказалі, што выбар цэляў адбываецца не выпадкова. Перад ударамі праводзіцца тэхнічны аналіз, у якім удзельнічаюць інжынеры-энергетыкі і спецыялісты нафтавай галіны. Яны дапамагаюць вызначыць, якія вузлы НПЗ з’яўляюцца найбольш важнымі і якія дэталі будзе складаней за ўсё замяніць.
Пры планаванні аперацый улічваюцца розныя сцэнарыі. Калі беспілотнік не можа паразіць асноўную цэль з-за працы расійскай супрацьпаветранай абароны або праблем з навігацыяй, яму задаюць запасныя варыянты — іншыя загадзя вызначаныя аб’екты.
Асноўная мэта такой стратэгіі — не проста нанесці шкоду асобнаму заводу, а парушыць працу ўсёй звязанай энергетычнай сістэмы. Украінскія спецыялісты разглядаюць расійскую інфраструктуру як сетку ўзаемазалежных аб’ектаў: НПЗ, электрападстанцый і ліній электраперадачы.
Аналітыкі адзначаюць, што Украіна стварае падрабязныя карты расійскай энергасістэмы і шукае так званыя вузлавыя пункты — месцы, пашкоджанне якіх можа выклікаць значныя збоі ва ўсёй сістэме. Асаблівая ўвага надаецца абсталяванню, якое цяжка хутка замяніць.
Акрамя таго, украінскія падраздзяленні беспілотнікаў пачалі наносіць паўторныя ўдары па адных і тых жа важных элементах НПЗ да таго, як расійскія спецыялісты паспеюць завяршыць рамонт. Гэта не дазваляе прадпрыемствам цалкам аднавіць працу.
Раней асноўнай цэллю для ўдараў былі таксама буйныя нафтавыя сховішчы. Для іх паражэння выкарыстоўваліся боепрыпасы з асколкавымі элементамі.
Як падкрэслівае Financial Times, украінскія і расійскія інжынеры добра разумеюць асаблівасці энергетычнай інфраструктуры адзін аднаго, паколькі абедзве краіны атрымалі шмат у чым падобныя савецкія прамысловыя сістэмы.
Наступствы ўдараў ужо адчуваюцца ў Расіі. У краіне працягваецца паліўная напружанасць, звязаная са зніжэннем магчымасцяў асобных НПЗ. Расійскія ўлады рыхтуюць меры для пашырэння імпарту дызельнага паліва пасля таго, як ужо пачалі закупляць бензін у Беларусі, Казахстана і Індыі.
Гэта адбываецца на фоне таго, што раней Расія была адным з найбуйнейшых экспарцёраў дызельнага паліва. Значная частка вырабленага дызелю пастаўлялася за мяжу, але цяпер частку рэсурсаў даводзіцца перанакіроўваць на ўнутраны рынак.
Каб не дапусціць дэфіцыту ў Маскоўскім рэгіёне, Расія павялічвае пастаўкі паліва з Сібіры і закупкі ў Беларусі. Аднак на агульнанацыянальным узроўні праблемы з забеспячэннем палівам працягваюць захоўвацца.
Украінскія беспілотнікі атакавалі Разань — гараць склад Wildberries і НПЗ
Дроны атакавалі Цюмень больш чым за 2000 км ад мяжы Украіны
20 літраў у бак і ніякіх каністраў? Ці сапраўды на беларускіх запраўках на мяжы з Расіяй увялі ліміты на бензін
«Думка, што непадалёку нешта ўзарвалі, трывожыць». Беларусы, якія жывуць у Расіі, расказалі пра цяперашнюю атмасферу там
У Сызрані пасля атакі дронаў гарыць нафтаперапрацоўчы завод
Каментары