Дураў: Расійскія чыноўнікі пераблыталі, хто каго можа забаніць у інтэрнэце
Заснавальнік Telegram Павел Дураў адрэагаваў на рашэнне расійскіх уладаў унесці яго ў спіс «экстрэмістаў і тэрарыстаў». У сваім тэлеграм-канале ён заявіў, што прычынай пераследу стала яго адмова ўдзельнічаць у масавым сачэнні за карыстальнікамі і ў цэнзуры кантэнту.
«Паводле расійскага заканадаўства, мне забаронена публікаваць інфармацыю ў інтэрнэце. Расійскія чыноўнікі пераблыталі, хто каго можа забаніць у інтэрнэце», — напісаў Дураў.
Паводле расійскіх законаў, асобам, уключаным у пералік «экстрэмістаў і тэрарыстаў», забараняецца, у тым ліку, публікаваць матэрыялы ў інтэрнэце і ўзаемадзейнічаць са сродкамі масавай інфармацыі.
Акрамя таго, прадпрымальнік, які цяпер жыве ў Аб'яднаных Арабскіх Эміратах, апублікаваў ілюстрацыю, на якой ён сам пазначаны як «тэрарыст», а прадстаўнікі руху «Талібан», з якімі паціскае руку кіраўнік МЗС Расіі Сяргей Лаўроў, названыя «паважанымі партнёрамі».
Напярэдадні ФСБ паведаміла, што выставіла Дураву абвінавачанне ў садзейнічанні тэрарыстычнай дзейнасці. Пасля гэтага Расфінманіторынг уключыў яго ў спіс «экстрэмістаў і тэрарыстаў». Такі статус прадугледжвае замарожванне банкаўскіх рахункаў, сур'ёзныя абмежаванні на фінансавыя аперацыі, а таксама іншыя прававыя наступствы, у тым ліку забарону на інтэрнэт-актыўнасць.
Паводле версіі ФСБ, адміністрацыя Telegram адмаўлялася выдаляць каналы, чаты і боты, праз якія, як сцвярджаюць расійскія спецслужбы, украінскія спецслужбы, а таксама арганізацыі, прызнаныя ў Расіі тэрарыстычнымі і экстрэмісцкімі, арганізоўвалі тэракты, кіберашуканства і іншыя злачынствы. У прыватнасці, сцвярджаецца, што праз чат-бот знаёмстваў «Дайвинчик/Leo» нібыта вербавалі маладых расіян для ўдзелу ў дыверсійнай дзейнасці.
Расійскія ўлады абвясцілі Дурава ў міжнародны вышук. Паводле паведамленняў расійскіх дзяржаўных органаў, яму пагражае пажыццёвае пазбаўленне волі.
Прэс-сакратар Крамля Дзмітрый Пяскоў нядаўна заяўляў, што расійскія ўлады працягваюць падтрымліваць кантакты з кіраўніцтвам Telegram адносна аднаўлення супрацоўніцтва, аднак, паводле яго слоў, істотнага прагрэсу пакуль няма. Раней дырэктар ФСБ Аляксандр Бортнікаў сцвярджаў, што папярэднія перамовы з Дуравым не прынеслі вынікаў, і абвінавачваў яго ў тым, што палітыка Telegram нібыта спрыяе распаўсюджванню тэрарызму, дыверсій і іншых злачынстваў. Адміністрацыя Telegram гэтыя абвінавачанні не прызнавала.
У мінскім гандлёвым цэнтры Palazzo сабралася даўжэзная чарга. Па дармовых мядзведзікаў!2
Каментары