Meta заплаціць 18 мільярдаў даляраў праз абвінавачанні ў шкодзе сацсетак для дзяцей

Прэтэнзіі да Meta назапашваліся не адзін год. Улады амерыканскіх штатаў абвінавачвалі кампанію ў тым, што яна ведала пра небяспеку сваіх платформаў для дзяцей, але працягвала выкарыстоўваць механізмы, якія прымушалі маладых карыстальнікаў зноў і зноў вяртацца ў Instagram і Facebook.

Асобная група з 29 штатаў сцвярджала, што Meta незаконна збірала звесткі пра дзяцей, якім яшчэ не споўнілася 13 гадоў.

Урэшце справа дайшла да федэральнага суда ў Каліфорніі. Галоўную ролю ў ёй адыгрывалі генеральныя пракуроры Каліфорніі, Каларада, Кентукі і Нью-Джэрсі. Яны сцвярджалі, што гаворка ішла не проста пра пабочныя наступствы папулярнасці сацсетак: на іх думку, Meta свядома стварала свае прадукты такімі, каб яны выклікалі залежнасць у маладых карыстальнікаў.

Стаўкі былі надзвычай высокія. Згаданыя чатыры штаты патрабавалі ад Meta каля 200 мільярдаў даляраў, а сярод кіраўнікоў кампаніі, якіх чакалі ў судзе, быў і Марк Цукерберг. Кіраўнік Instagram Адам Масеры ўжо паспеў даць паказанні.

Але да поўнага разгляду справа не дайшла. Неўзабаве пасля пачатку працэсу Meta дамовілася са штатамі аб урэгуляванні.

Як паведамляе Finanсial Times, згодна з апублікаванымі 26 жніўня судовымі дакументамі, Meta пагадзілася выплаціць 16,68 мільярда даляраў 47 штатам, акрузе Калумбія і тром амерыканскім тэрыторыям. Яшчэ 1 мільярд даляраў кампанія выплаціць Тэхасу ў межах асобнага пагаднення, што даводзіць агульную суму выплат амаль да 18 мільярдаў даляраў.

Што зменіцца для падлеткаў

У межах пагаднення Meta пагадзілася ўвесці для непаўналетніх карыстальнікаў сваіх сацсетак стандартныя дзённыя абмежаванні на час карыстання і блакіроўку ў начны час.

Кампанія таксама павінна ўзмацніць праверку ўзросту, каб дзеці не атрымлівалі доступу да непрыдатнага для іх кантэнту, і даць бацькам і апекунам дадатковыя магчымасці кантраляваць карыстанне сацсеткамі.

На WhatsApp і іншыя сэрвісы Meta, прызначаныя перадусім для абмену паведамленнямі, гэтыя абмежаванні распаўсюджвацца не будуць.

Новыя меры кантролю Meta не будуць дзейнічаць у Фларыдзе і Нью-Мексіка, якія не далучыліся да заключанага пагаднення і таму не атрымаюць сваю долю выплат.

Не ўсе 18 мільярдаў даляраў Meta абавязкова давядзецца выплаціць. Кампанія ўдакладніла, што каля 5,3 мільярда даляраў з агульнай сумы будуць выплачаныя толькі ў тым выпадку, калі Snap, уладальнік Snapchat, TikTok і YouTube, таксама ўрэгулюе сітуацыю са штатамі і пагодзіцца на фінансавыя штрафы і змены ў прадукце.

Meta тлумачыць такую ўмову тым, што падлеткі карыстаюцца адразу многімі платформамі, таму абмежаванні будуць больш эфектыўнымі, калі падобныя правілы пачнуць дзейнічаць ва ўсёй індустрыі. Meta заявіла, што ўвядзе больш жорсткія ліміты часу і абмежаванні на начны доступ па змаўчанні, калі на гэта пагодзяцца YouTube і TikTok.

Само пагадненне таксама не азначае, што Meta адразу пералічыць усю суму. Выплаты будуць размеркаваныя на дзесяць гадоў.

Наколькі 18 мільярдаў даляраў — вялікая сума для Meta

18 мільярдаў даляраў — велізарная сума нават для адной з найбуйнейшых тэхналагічных кампаній свету. Але фінансавыя паказчыкі Meta дазваляюць лепш зразумець яе маштаб.

За мінулы год кампанія атрымала каля 201 мільярда даляраў выручкі і больш за 60 мільярдаў даляраў чыстага прыбытку. Такім чынам, максімальная сума пагаднення роўная амаль 30% гадавога прыбытку Meta.

Яшчэ больш паказальнае параўнанне — з апошнім кварталам: за тры месяцы Meta зарабіла 18,3 мільярда даляраў, фактычна столькі ж, колькі можа максімальна каштаваць цяперашняе ўрэгуляванне.

Але самімі выплатамі штатам выдаткі кампаніі не абмяжуюцца. Meta ацэньвае звязаныя з пагадненнем судовыя і юрыдычныя выдаткі яшчэ прыкладна ў 10 мільярдаў даляраў. Такім чынам, разам з максімальнымі выплатамі штатам гэтая гісторыя тэарэтычна можа каштаваць кампаніі да 28 мільярдаў даляраў.

Праўда, гэтыя грошы не давядзецца аддаваць адразу: выплаты паводле пагаднення будуць размеркаваныя на дзесяць гадоў. Сама Meta заяўляе, што не чакае істотнага ўплыву пагаднення на свае квартальныя фінансавыя вынікі, у тым ліку таму, што непаўналетнія карыстальнікі прыносяць кампаніі адносна невялікую частку даходаў.

Ціск на сацсеткі расце

Meta — не адзіная тэхналагічная кампанія, якая сутыкнулася з такімі прэтэнзіямі. Супраць сацыяльных сетак у ЗША пададзеныя шматлікія пазовы, звязаныя з магчымым уплывам іх прадуктаў на дзяцей.

У сакавіку ў іншай справе ў Лос-Анджэлесе Meta і Google прызналі адказнымі за стварэнне праграм, якія, паводле пазоўніка, былі распрацаваныя так, каб выклікаць залежнасць у дзяцей.

Адначасова ў розных краінах узмацняюць патрабаванні да сацыяльных сетак. Аўстралія, еўрапейскія краіны, Вялікабрытанія і асобныя амерыканскія штаты ўводзяць або рыхтуюць узроставыя абмежаванні для доступу дзяцей і малодшых падлеткаў да Instagram, Snapchat, YouTube, TikTok і іншых платформаў.

Таму цяперашняе пагадненне з Meta можа мець значэнне не толькі для самой кампаніі: ад таго, ці пойдуць на падобныя ўмовы яе канкурэнты, можа залежаць, ці стануць новыя абмежаванні для непаўналетніх агульным стандартам для найбуйнейшых сацыяльных платформаў.

• 0
• 0
• 0
• 1
• 0
• 0
• 0
• 0