Meta zapłacić 18 miljardaŭ dalaraŭ praz abvinavačańni ŭ škodzie sacsietak dla dziaciej

Pretenzii da Meta nazapašvalisia nie adzin hod. Ułady amierykanskich štataŭ abvinavačvali kampaniju ŭ tym, što jana viedała pra niebiaśpieku svaich płatformaŭ dla dziaciej, ale praciahvała vykarystoŭvać miechanizmy, jakija prymušali maładych karystalnikaŭ znoŭ i znoŭ viartacca ŭ Instagram i Facebook.

Asobnaja hrupa z 29 štataŭ śćviardžała, što Meta niezakonna źbirała źviestki pra dziaciej, jakim jašče nie spoŭniłasia 13 hadoŭ.

Urešcie sprava dajšła da fiederalnaha suda ŭ Kalifornii. Hałoŭnuju rolu ŭ joj adyhryvali hienieralnyja prakurory Kalifornii, Kałarada, Kientuki i Ńju-Džersi. Jany śćviardžali, što havorka išła nie prosta pra pabočnyja nastupstvy papularnaści sacsietak: na ich dumku, Meta śviadoma stvarała svaje pradukty takimi, kab jany vyklikali zaležnaść u maładych karystalnikaŭ.

Staŭki byli nadzvyčaj vysokija. Zhadanyja čatyry štaty patrabavali ad Meta kala 200 miljardaŭ dalaraŭ, a siarod kiraŭnikoŭ kampanii, jakich čakali ŭ sudzie, byŭ i Mark Cukierbierh. Kiraŭnik Instagram Adam Masiery ŭžo paśpieŭ dać pakazańni.

Ale da poŭnaha razhladu sprava nie dajšła. Nieŭzabavie paśla pačatku pracesu Meta damoviłasia sa štatami ab urehulavańni.

Jak paviedamlaje Finansial Times, zhodna z apublikavanymi 26 žniŭnia sudovymi dakumientami, Meta pahadziłasia vypłacić 16,68 miljarda dalaraŭ 47 štatam, akruzie Kałumbija i trom amierykanskim terytoryjam. Jašče 1 miljard dalaraŭ kampanija vypłacić Techasu ŭ miežach asobnaha pahadnieńnia, što davodzić ahulnuju sumu vypłat amal da 18 miljardaŭ dalaraŭ.

Što źmienicca dla padletkaŭ

U miežach pahadnieńnia Meta pahadziłasia ŭvieści dla niepaŭnaletnich karystalnikaŭ svaich sacsietak standartnyja dzionnyja abmiežavańni na čas karystańnia i błakiroŭku ŭ načny čas.

Kampanija taksama pavinna ŭzmacnić pravierku ŭzrostu, kab dzieci nie atrymlivali dostupu da nieprydatnaha dla ich kantentu, i dać baćkam i apiekunam dadatkovyja mahčymaści kantralavać karystańnie sacsietkami.

Na WhatsApp i inšyja servisy Meta, pryznačanyja pieradusim dla abmienu paviedamleńniami, hetyja abmiežavańni raspaŭsiudžvacca nie buduć.

Novyja miery kantrolu Meta nie buduć dziejničać u Fłarydzie i Ńju-Mieksika, jakija nie dałučylisia da zaklučanaha pahadnieńnia i tamu nie atrymajuć svaju dolu vypłat.

Nie ŭsie 18 miljardaŭ dalaraŭ Meta abaviazkova daviadziecca vypłacić. Kampanija ŭdakładniła, što kala 5,3 miljarda dalaraŭ z ahulnaj sumy buduć vypłačanyja tolki ŭ tym vypadku, kali Snap, uładalnik Snapchat, TikTok i YouTube, taksama ŭrehuluje situacyju sa štatami i pahodzicca na finansavyja štrafy i źmieny ŭ pradukcie.

Meta tłumačyć takuju ŭmovu tym, što padletki karystajucca adrazu mnohimi płatformami, tamu abmiežavańni buduć bolš efiektyŭnymi, kali padobnyja praviły pačnuć dziejničać va ŭsioj industryi. Meta zajaviła, što ŭviadzie bolš žorstkija limity času i abmiežavańni na načny dostup pa zmaŭčańni, kali na heta pahodziacca YouTube i TikTok.

Samo pahadnieńnie taksama nie aznačaje, što Meta adrazu pieraličyć usiu sumu. Vypłaty buduć raźmierkavanyja na dziesiać hadoŭ.

Nakolki 18 miljardaŭ dalaraŭ — vialikaja suma dla Meta

18 miljardaŭ dalaraŭ — vielizarnaja suma navat dla adnoj z najbujniejšych technałahičnych kampanij śvietu. Ale finansavyja pakazčyki Meta dazvalajuć lepš zrazumieć jaje maštab.

Za minuły hod kampanija atrymała kala 201 miljarda dalaraŭ vyručki i bolš za 60 miljardaŭ dalaraŭ čystaha prybytku. Takim čynam, maksimalnaja suma pahadnieńnia roŭnaja amal 30% hadavoha prybytku Meta.

Jašče bolš pakazalnaje paraŭnańnie — z apošnim kvartałam: za try miesiacy Meta zarabiła 18,3 miljarda dalaraŭ, faktyčna stolki ž, kolki moža maksimalna kaštavać ciapierašniaje ŭrehulavańnie.

Ale samimi vypłatami štatam vydatki kampanii nie abmiažujucca. Meta aceńvaje źviazanyja z pahadnieńniem sudovyja i jurydyčnyja vydatki jašče prykładna ŭ 10 miljardaŭ dalaraŭ. Takim čynam, razam z maksimalnymi vypłatami štatam hetaja historyja tearetyčna moža kaštavać kampanii da 28 miljardaŭ dalaraŭ.

Praŭda, hetyja hrošy nie daviadziecca addavać adrazu: vypłaty pavodle pahadnieńnia buduć raźmierkavanyja na dziesiać hadoŭ. Sama Meta zajaŭlaje, što nie čakaje istotnaha ŭpłyvu pahadnieńnia na svaje kvartalnyja finansavyja vyniki, u tym liku tamu, što niepaŭnaletnija karystalniki prynosiać kampanii adnosna nievialikuju častku dachodaŭ.

Cisk na sacsietki raście

Meta — nie adzinaja technałahičnaja kampanija, jakaja sutyknułasia z takimi pretenzijami. Suprać sacyjalnych sietak u ZŠA padadzienyja šmatlikija pazovy, źviazanyja z mahčymym upłyvam ich praduktaŭ na dziaciej.

U sakaviku ŭ inšaj spravie ŭ Łos-Andželesie Meta i Google pryznali adkaznymi za stvareńnie prahram, jakija, pavodle pazoŭnika, byli raspracavanyja tak, kab vyklikać zaležnaść u dziaciej.

Adnačasova ŭ roznych krainach uzmacniajuć patrabavańni da sacyjalnych sietak. Aŭstralija, jeŭrapiejskija krainy, Vialikabrytanija i asobnyja amierykanskija štaty ŭvodziać abo rychtujuć uzrostavyja abmiežavańni dla dostupu dziaciej i małodšych padletkaŭ da Instagram, Snapchat, YouTube, TikTok i inšych płatformaŭ.

Tamu ciapierašniaje pahadnieńnie z Meta moža mieć značeńnie nie tolki dla samoj kampanii: ad taho, ci pojduć na padobnyja ŭmovy jaje kankurenty, moža zaležać, ci stanuć novyja abmiežavańni dla niepaŭnaletnich ahulnym standartam dla najbujniejšych sacyjalnych płatformaŭ.

• 0
• 0
• 0
• 1
• 0
• 0
• 0
• 0