Абама ўсё менш папулярны

Упершыню больш за палову амерыканцаў не ўхваляе дзейнасць прэзідэнта ЗША Барака Абамы, паказала сацапытанне. Цяпер яго падтрымліваюць толькі 45% амерыканцаў, а 52% — не. Такія нізкія паказчыкі былі толькі ў амерыканскага прэзідэнта Рональда Рэйгана, калі краіна перажывала самы вялікі спад з часоў Вялікай дэпрэсіі.

Рэйтынг прэзідэнта ЗША Барака Абамы дасягнуў рэкордна нізкай адзнакі з пачатку яго тэрміну на гэтай пасадзе. Несуцяшальныя дадзеныя былі прыведзеныя ў сумесным сацыялагічным даследаванні Ipsos і Reuters.

На канец жніўня дзейнасць Абамы ўхваляе 45% амерыканцаў, а 52% праца прэзідэнта краіны не задавальняе.

Яшчэ ў ліпені прыхільнікі і праціўнікі Абамы ў тым жа апытанні падзяліліся роўна на дзве групы — па 48% падтрымлівалі і выступалі супраць дзейнасці кіраўніка краіны. У пачатку 2009 толькі 26% негатыўна ставіліся да працы прэзідэнта, падтрымка Абамы складала рэкордныя 69%.

У 62% амерыканцаў ёсць цвёрдае адчуванне, што цяпер ЗША ідзе па нейкім няправільным шляху. Толькі 31% упэўнены, што выбраны правільны напрамак развіцця. Зрэшты, упершыню 60% заявілі, што напрамак краіна ўзяла няправільны, яшчэ ў канцы мінулага года.

На думку складальнікаў апытання, становішча Абамы вельмі нагадвае сітуацыю з прэзідэнтам Рональдам Рэйганам, які кіраваў краінай з 1981 па 1989: у гэты час адбыўся наймацнейшы эканамічны спад з часоў Вялікай дэпрэсіі.

За кошт росту беспрацоўя, спаду эканамічнага развіцця Рэйган ледзь не страціў магчымасць пайсці на перавыбары. Аднак да заканчэння яго першага тэрміну ўзровень беспрацоўя скараціўся, дабрабыт выбаршчыкаў падвысіўся, і Рэйган здолеў набраць 59% галасоў у сваю падтрымку.

Цяпер амерыканцаў хвалюе ў першую чаргу беспрацоўе — гэтым пытаннем заклапочаныя 72% удзельнікаў апытання. Другое па важнасці пытанне — дзяржвыдаткі (67%). Цяпер ўзровень беспрацоўя складае 7,5%, да 2012 прагназуецца ўзровень у 7,1% — па амерыканскіх мерках гэта ўсё адно вельмі высокі паказчык.

Нізкія рэйтынгі Абамы ўжо на ўсю моц выкарыстаюць апаненты прэзідэнта з Рэспубліканскай партыі. Кангрэсмэн ад штата Агаё Джон Бонер заявіў, што групе эканамічных дарадцаў прэзідэнта Абамы варта ў поўным складзе сысці ў адстаўку. Ён раскрытыкаваў Белы дом за надзвычай высокія дзяржаўныя выдаткі. У адказ віцэ-прэзідэнт Джо Байдэн абвінаваціў Бонера ў спробе вярнуцца да той эканамічнай мадэлі, якая прывяла да сусветнага эканамічнага крызісу. Хоць рэспубліканцы і згадваюць рэйтынгі прэзідэнта, 78% амерыканцаў ўпэўнены, што Вашынгтон не можа эфектыўна працаваць менавіта праз сутыкненні паміж партыямі і галінамі ўлады, якія не дазваляюць дасягнуць якіх-небудзь вынікаў. Толькі 20% не згодныя з такой трактоўкай.

Эканамічны спад, які пачаўся ў 2007, фактычна дастаўся Абаму ў спадчыну, а ўвосень 2008 пачаўся эканамічны крызіс. «Эканоміка сапраўды паўплывала на Абаму і яго адміністрацыю», — пракаментаваў даследаванне сацыёлаг Ipsos Кліф Янг.

«На нейкі час выбаршчыкі далі яму магчымасць скарыстацца агульнай збянтэжанасцю. Ён атрымаў у спадчыну вельмі рызыкоўную эканамічную сітуацыю, і яны былі гатовыя даць яму час, — патлумачыў Янг. — Цяпер цярпенне ў асноўным скончылася».

Прафесар палітычных навук універсітэта Аёвы Майкл Льюіс-Бек упэўнены, што ў Абамы яшчэ ёсць час палепшыць эканамічныя паказчыкі. «Для выбаршчыкаў усе гэтыя рэчы пачынаюць граць ролю за год да выбараў», — заявіў эксперт Reuters. «Я вельмі сумняюся, што большасць выбаршчыкаў будзе галасаваць за ці супраць Абамы на аснове велічыні дэфіцыту федэральнага бюджэту», — упэўнены прафесар паліталогіі і сувязяў з грамадскасцю Прынстанскага ўніверсітэта Лары Бартэлс. Ён адзначыў, што на працягу першага тэрміну прэзідэнта Біла Клінтана дэфіцыт знізіўся на 90%, але большасць людзей нават не ведалі пра гэта. Дырэктар кампаніі Daily Kos Крыс Баўэрс упэўнены, што ў выпадку з беспрацоўем людзі будуць звяртаць увагу не на фактычнае зніжэнне, а на тэндэнцыю да скарачэння. «Калі гэта здарыцца, пачуццё паляпшэння дасць вялізны імпульс яго перадвыбарным перспектывам», — упэўнены эксперт.

• 0
• 0
• 0
• 0
• 0
• 0
• 0
• 0