НІСЭПД: Рэйтынг Лукашэнкі ўпаў ніжэй за 30%

Апытанне праводзілася ў чэрвені і зафіксавала калапс падтрымкі ўладаў.

Метадам face-to-face interview спецыялісты НІСЭПД апыталі ў чэрвені 1503 рэспандэнты ва ўзросце 18 гадоў і старэйшых, памылка рэпрэзентатыўнасці не перавышае 3%).

Пагаршэнне «эканамічнага самаадчування» беларусаў пасля прэзідэнцкіх выбараў 19 снежня 2010 г., зафіксаванае ў сакавіку, сёння можна характарызаваць як сапраўдны абвал.

Так, колькасць рэспандэнтаў, якія сказалі, што іх матэрыяльнае становішча за апошнія тры месяцы пагоршала, узрасла да 73%.

82% лічаць, што «беларуская эканоміка знаходзіцца ў крызісе», прычым віну за гэта ўскладаюць перш за ўсё на прэзідэнта (45%) і ўрад (37%), а не на сусветны крызіс (27%) або спекулянтаў (17%).

Колькасць тых, хто лічыць, што «ў цэлым сітуацыя ў Беларусі развіваецца ў няправільным кірунку», усяго за тры месяцы ўзрасла з 40% да 62%, а «ў правільным», наадварот, знізілася з 45% да 26%. Гэта амаль найніжэйшы паказчык за ўсю гісторыю маніторынгу НІСЭПД.

У людзей нарастае адчуванне, што мы жывём у паліцэйскай дзяржаве. Звыш паловы апытаных (53%) сёння лічаць, што А. Лукашэнка перш за ўсё абапіраецца «на вайскоўцаў, МУС, КДБ», 38% — «на прэзідэнцкую» вертыкаль», 24% — «на дзяржаўных чыноўнікаў». Для параўнання: «на простых людзей» — 19%, «на спецыялістаў» — 7%, «на культурную і навуковую эліту» — 4%.

Колькасць адказаў «прэзідэнт забяспечвае непаспяхова» перавышае колькасць адказаў «паспяхова» (у тым ліку, «пад’ём эканомікі, рост дабрабыту» — 16% супраць 76%, «падтрыманне стабільнасці ў грамадстве» — 30% супраць 60%, «барацьбу з карупцыяй» — 35% супраць 49%).

На пытанне: «Як Вы лічыце, тое, што ў руках А.Лукашэнкі сканцэнтравана цяпер практычна ўся ўлада ў краіне, ідзе на карысць Беларусі ці не дае краіне нічога добрага?» 59% адказалі «не дае краіне нічога добрага» і толькі 26% — «ідзе на карысць Беларусі» (у верасні мінулага года гэтыя суадносіны было 39% супраць 44%).

Нядзіўна, што лічба гатовых зноў прагаласаваць за Лукашэнку на прэзідэнцкіх выбарах апусцілася ніжэй за 30% і склала 29,3% (у снежні 2010 г. — 53%, у сакавіку 2011 г. — 42.9%).

Стаўленне беларусаў да Расеі становіцца ўсё больш складаным.

Так, з аднаго боку, заяву міністра фінансаў А. Кудрына, што «Расея дасць крэдыт у памеры 3 млрд даляраў пры ўмове, калі Беларусь правядзе эканамічныя рэформы» палічылі справядлівым рашэннем 47%, а несправядлівым — 37%. З іншага боку,

«жаданне Расеі атрымаць буйныя беларускія прадпрыемствы, такія як «Белтрансгаз», МАЗ, «Беларуськалій» выклікала ў цэлым негатыўную рэакцыю беларусаў: 37% лічаць, што іх нельга прадаваць ні ў якім разе, а 20% — што іх не варта прадаваць расейцам,

Ацэньваючы становішча СМІ ў Беларусі, сёння ўжо 53% рэспандэнтаў лічаць, што яны залежныя, і толькі 10% — незалежныя.

Аб рэгулярным карыстанні інтэрнэтам заявілі 40% апытаных.

• 0
• 0
• 0
• 0
• 0
• 0
• 0
• 0