У 2021 годзе выпускніца адмовілася паціснуць руку Гігіну на ўручэнні дыплома. Цяпер БДУ не хоча яго пацвярджаць
Наталля Грыгарэнка за пяць гадоў паспела перабрацца ў Нью-Ёрк. І ўсё было цудоўна да таго моманту, як не ўзнікла праблема з дыпломам.
Наталля Грыгарэнка запомнілася беларусам сваім учынкам. Дзяўчына скончыла факультэт філасофіі і сацыяльных навук БДУ ў 2021 годзе — стала псіхолагам. У той час дэканам факультэта быў прапагандыст Вадзім Гігін.
На ўрачыстую цырымонію ўручэння дыпломаў Наталля прыйшла ў вышыванцы. Дзяўчына, якую затрымлівалі на адным з жаночых маршаў у 2020 годзе, паціскаць руку Гігіну не захацела прынцыпова.
«Калі я ішла насустрач дэкану, мне падалося, што ён змяніўся ў твары і раззлаваўся. Яшчэ на падыходзе да дэкана я заявіла, што руку паціскаць не буду. Ён сказаў нешта накшталт «ну і не трэба», — распавядала потым выпускніца.
Потым Гігін усё роўна паспрабаваў схапіць дзяўчыну за руку, калі аддаваў дыплом — але яна вывернулася. Прапагандыст, відавочна, быў не рады.
Наталля атрымала грын-карту і пераехала ў ЗША — цяпер яна жыве ў Нью-Ёрку. У дзяўчыны ёсць два варыянты: працягнуць адукацыю ці выйсці працаваць па спецыяльнасці, тым больш, што прапанова працы ўжо ёсць.
Але і ў адным, і ў другім варыянце Наталлі неабходна эвалюіраваць дыплом БДУ (гэта ацэнка дакумента аб адукацыі, каб скласці афіцыйную характарыстыку згодна з амерыканскім стандартам) — а з гэтым узніклі складанасці.
У відэа ў тыктоку Наталля ледзь стрымлівае слёзы:
— Я спрабавала звязацца з БДУ ўсімі магчымымі спосабамі. Я звязвалася са сваімі былымі выкладчыкамі, каб хоць нехта мне дапамог з пацвярджэннем дыплома.
Дзяўчына абурана тым, што заплаціла шмат грошай за сваю адукацыю — а ў выніку ўніверсітэт, які тыя грошы атрымаў, адмаўляецца пацвярджаць дыплом.
БГУ, факультет философии и социальных наук
— Ёсць кампаніі, якія звязваюцца з інстытутамі за грошы — таму, што ў іх ёсць свае каналы сувязі. Я звязалася з такой кампаніяй — яна працуе з 30 ВНУ ў Беларусі, але з БДУ — не, таму што БДУ адмаўляецца пацвярджаць дыпломы.
Наталля эмацыйна кажа, што яе дыплом зараз можна выкінуць у смецце, бо гэта проста кардонка. Яна шкадуе, што пасля школы не стала паступаць у ВНУ за мяжу праз складаныя сямейныя абставіны.
Калі Наталлі было 17 гадоў, памёр яе тата:
— Мне было шкада кідаць сваю маці, якая праз два гады таксама памерла. І цяпер у мяне няма нічога! Я змагла атрымаць грын-карту, я пераехала з дзвюма кошкамі і чамаданам. Я змагла! А атрымаць пацвярджэнне ад БДУ я не магу. Дзякуй вялікі!
Каментары
Магчыма з дадзеным выпадку можна праз суд падзтвердзіць той факт які чалавек не магчыма падзтвердзіць іншым чынам?
[Зрэдагавана]