Беларусь будзе развіваць геатэрмальную энергетыку

Перспектывы развіцця геатэрмальнай энергетыкі абмяркоўваліся 29 сакавіка на пасяджэнні дзяржсавета па пытаннях комплекснага выкарыстання мінеральна-сыравінных рэсурсаў пад старшынствам прэм’ер-міністра Міхаіла Мясніковіча.

Як паведамляе прэс-служба ўрада, удзельнікі пасяджэння адзначалі, што геатэрмальную энергію, ці энергію тэрмальных падземных вод, актыўна выкарыстоўваюць у многіх краінах. Беларусь таксама мае вопыт у гэтай сферы — пад Брэстам пабудавана і дзейнічае сучасная геатэрмальная станцыя.

«Паколькі Беларусь не мае значных запасаў мінеральна-сыравінных рэсурсаў, нам трэба думаць, як атрымліваць энергію з іншых крыніц, першым чынам узнаўляльных, — сказаў намеснік міністра прыродных рэсурсаў і аховы навакольнага асяроддзя Анатоль Ліс. — Пытанне стаіць шырэй: сёння мы павінны ўжываць і цеплавыя помпы, якія выкарыстоўваюць не толькі геатэрмальную энергію, але і энергію паверхневых вод, гэта вельмі сур’ёзная перспектыва. У Еўропе такую энергію выкарыстоўваюць для абагравання дамоў, розных устаноў».

Беларускія геолагі сумесна з сейсмолагамі і вучонымі склалі геатэрмальную карту Беларусі. Вядома, дзе знаходзяцца геатэрмальныя воды, на якіх глыбінях і якіх яны тэмператур. Найболей вывучаны ў гэтым плане Брэсцкая і Гомельская вобласці.

Спецыялісты адзначаюць, што ў асобных раёнах Беларусі тэмпература вады ў нетрах складае 80 градусаў па Цэльсіі і вышэй.

Як адзначае прэс-служба ўрада, Міхаіл Мясніковіч «надаў вялікую ўвагу пытанню рацыянальнага выкарыстання прэсных падземных вод, захаванню і паляпшэнню якасцяў водных рэсурсаў», адзначыўшы, што максімальнае выкарыстанне паўторнага, водаабаротнага забеспячэнні дапаможа зберагчы падземныя крыніцы.

На пасяджэнні таксама была ўзнятая тэма камерцыялізацыі водных рэсурсаў. Прэм’ер-міністр даручыў вывучыць магчымасць павелічэння паставак вады на экспарт.

Удзельнікі дзяржсавета таксама разгледзелі пытанне аб мэтазгоднасці асваення рэдказямельных радовішчаў. У сувязі з інтэнсіўным развіццём высокатэхналагічных галін попыт на рэдказямельныя элементы можа ўзрастаць, тым самым павялічваючы рэнтабельнасць іх здабычы і вытворчасці, лічаць ва ўрадзе.

Марына Носава, БелаПАН.

• 0
• 0
• 0
• 0
• 0
• 0
• 0
• 0