Былы народны дэпутат СССР і аўтар тэлеграм-канала «Черный полковник» Віктар Алксніс памёр у 74 гады.
Пра смерць Алксніса паведаміла яго дачка ў яго тэлеграм-канале. «У ноч на 30 снежня ў таты здарыўся гемарагічны інсульт, ён адразу ўпаў у глыбокую кому», — напісала яна.
Алксніс быў народным дэпутатам СССР (1989-1991), дэпутатам Вярхоўнага Савета Латвійскай ССР (1990-1991) і расійскай Дзярждумы (2000-2007). У 2013-2015 гадах узначальваў гарадское паселішча Тучкава ў Маскоўскай вобласці.
Ён быў у апазіцыі да Гарбачова і яго палітыкі «перабудовы». Калі здарыўся жнівеньскі путч 1991 года, падтрымаў ГКЧП.
У СМІ яго празвалі «чорным палкоўнікам».
«У вайне Расіі супраць Украіны Алксніс убачыў шанец на гістарычны рэванш, але сам ход пуцінскай «СВА» яго расчараваў», — напісаў пра былога дэпутата аналітык Аляксандр Фрыдман.
Ён згадаў сумесныя стрымы Алксніса і Гіркіна-Стралкова.
«Мыць посуд пад іх гнеўныя развагі пра «бяздарнага Пуціна», «фанернага маршала» Шайгу, хлуслівых расійскіх генералаў і пра «беларускага нацыяналіста» Лукашэнку, нібыта гатовага здрадзіць Расіі пры першай жа магчымасці, было сапраўднай асалодай. Сярод гратэскавых паяцаў з салаўёўска-скабееўскіх «оргій вар'яцтва» такіх з агнём не адшукаць.
У адрозненне ад многіх наскрозь фальшывых расійскіх z-патрыётаў таварыш Алксніс не быў апартуністам і праз усё жыццё пранёс вернасць сваім адыёзным ідэалам», — даў ацэнку Фрыдман.
Каментары