Генеральнай пракуратурай Беларусі заведзена крымінальная справа ў дачыненні да дырэктара ВКУП "ЖКГ Мінскага раёна", які неправамерна выпісваў сабе і іншым кіраўнікам прадпрыемствы вялікія прэміі.
Крымінальная справа ў дачыненні да дырэктара ВКУП "ЖКГ Мінскага раёна", які таксама з'яўляецца дэпутатам Мінскага раённага Савета дэпутатаў, была заведзеная пасля адпаведнай праверкі Галоўнага ўпраўлення барацьбы з арганізаванай злачыннасцю і карупцыяй (ГУБАЗіК) МУС.
Паводле папярэдніх дадзеных, падазраваны з красавіка 2008 па снежань 2010 года, дзейнічаючы насуперак інтарэсам службы, у парушэнне заканадаўства, з карыслівай зацікаўленасці неаднаразова даваў падначаленым супрацоўнікам распараджэнні аб унясенні ў бухгалтарскія і іншыя справаздачныя дакументы загадзя ілжывых звестак аб фінансавым становішчы прадпрыемства.
Так, па ўказанні дырэктара ў справаздачнасць ўносіліся ілжывыя звесткі аб звышнарматыўных стратах газу і электраэнергіі, а таксама аб устойлівай запазычанасці перад бюджэтам па аплаце за энерганосьбіты і выплаце работнікам заработнай платы. Прасцей кажучы, дырэктар усё гэта хаваў і выдаваў незаконныя загады аб прэміраванні супрацоўнікаў апарата кіравання, не забываючы і пра сябе.
У адпаведнасці з гэтымі загадамі кіраўнікі ВКУП "ЖКГ Мінскага раёна", у тым ліку і сам дырэктар незаконна атрымлівалі вялікія прэміі, якіх проста не заслугоўвалі.
Паводле падлікаў барцоў з карупцыяй, амаль за тры гады за кошт прадпрыемства яго кіраўнікі атрымалі на рукі больш за 123 мільёны рублёў.
Па дадзеным факце ў дачыненні да дырэктара ВКУП "ЖКГ Мінскага раёна" Генеральнай пракуратурай распачата крымінальная справа па прыкметах злачынства, прадугледжанага ч.3 арт.424 Крымінальнага кодэкса Беларусі (злоўжыванне ўладай або службовым становішчам, здзейсненае службовай асобай, якая займае адказнае становішча, альбо пры выкананні функцыяў па раздзяржаўленні ці прыватызацыі дзяржаўнай маёмасці, альбо якія мелі цяжкія наступствы).
Крымінальная справа перададзена для далейшага следства ў Следчы камітэт Беларусі.
23‑гадовы рэпер з Астраўца загінуў за Расію на вайне. Паваяваў ён, відаць, каля месяца17
Каментары