Паведамленне пра тэлефонную размову Лукашэнкі і Туска знікла з сайтаў прэзідэнта, БелТА і «Інтэрфакса»
«Сёння з ініцыятывы польскага боку адбылася тэлефонная размова Аляксандра Лукашэнкі з прэм'ер-міністрам Польшчы Дональдам Тускам. Абмяркоўвалася развіццё міжнароднай абстаноўкі ў сувязі з падзеямі ва Украіне, паведамілі ў прэс-службе Лукашэнкі», — такое паведамленне з'явілася сёння на сайтах агенцтваў БелТА і «Інтэрфакс-Захад».
З'явілася, але неўзабаве знікла.
Па стане на 20.30 навіны больш няма. Публікацыі, зрэшты, захаваліся ў кэшы. Вось скрыншоты.
Імаверна, беларускае кіраўніцтва палічыла немэтазгодным, каб інфармацыя пра размову з прэм'ерам Польшчы трапіла ў беларускія масавыя СМІ.
На дадзены момант рэдактары агенцтваў БелТА і «Інтэрфакс» недаступныя для каментароў.
Гэта была першая размова кіраўніка дзяржавы Еўрасаюза з Аляксандрам Лукашэнкам пасля пагрому Плошчы 2010 года.
Прэм'ер-міністр Польшчы Дональд Туск пацвердзіў журналістам, што цягам апошніх некалькіх гадзін размаўляў пра сітуацыю ва Украіне з Аляксандрам Лукашэнкам, а ўчора — з прэм'ер-міністрам Украіны Арсенем Яцанюком і кіраўніком Еўракамісіі Жазэ Барозу. Туск мае намер ўвечары паразмаўляць таксама з кіраўніком НАТА.
«Па некалькі гадзін размаўляў з маімі партнёрамі пра сітуацыю ва Украіне і пра тое, што можа адбыцца літаральна на працягу некалькіх дзён, учора — перамовы з прэм'ер-міністрам Канады Стывенам Харперам, кіраўніком Еўрапейскай камісіі, прэм'ер-міністрам Украіны Арсенем Яцанюком, сёння была размова з прэзідэнтам Рэспублікі Беларусь — першая такога тыпу размова, але выклікана яна драматычнай сітуацыяй ва Украіне», — сказаў Туск.
«З гэтых размоваў вынікае, што бліжэйшыя некалькі дзён стануць ключавымі і што вельмі складана сёння гаварыць пра аптымістычны сцэнар. Усе мы, разам з маімі суразмоўцамі і іншымі партнёрамі, будзем старацца прадухіліць чорны сцэнар», — сказаў сёння прэм'ер-міністр Польшчы.
Цяпер чытаюць
Стала вядома, колькі грошай атрымлівалі ад крамлёўскага фонду Лушч, Мірсалімава і Герашчанка7
Стала вядома, колькі грошай атрымлівалі ад крамлёўскага фонду Лушч, Мірсалімава і Герашчанка
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў88
Каментары