Эрдаган запусціў праграму па масавай праверцы вагі грамадзян на вуліцах
Прэзідэнт Турцыі Рэджэп Таіп Эрдаган пачаў маштабную кампанію супраць атлусцення — цяпер грамадзян могуць публічна ўзважваць проста на вуліцах. Некаторыя лічаць гэтую ініцыятыву аўтарытарнай і прыніжальнай.
Эрдаган ініцыяваў маштабную кампанію па барацьбе з атлусценнем, якая ўключае публічныя праверкі вагі грамадзян на вуліцах.
З 10 мая па 10 ліпеня супрацоўнікі санітарных службаў будуць вымяраць рост і вагу грамадзян у грамадскіх месцах, разлічваць індэкс масы цела і, у выпадку перавышэння нормы, накіроўваць людзей у медыцынскія цэнтры для кансультацый з дыетолагамі.
Мэта кампаніі — ахапіць 10 мільёнаў чалавек ва ўсіх 81 правінцыі краіны, піша Turkish Minute.
Паводле даных Сусветнай арганізацыі аховы здароўя, на 2023 год траціна дарослых у Турцыі пакутуе ад атлусцення.
Эксперты звязваюць рост атлусцення не толькі з ладам жыцця, але і з пагаршэннем эканамічнай сітуацыі ў краіне, якая абмяжоўвае доступ да здаровага харчавання.
Ініцыятыва выклікала сур'ёзную крытыку ў сацыяльных сетках. Карыстальнікі выказваюць занепакоенасць магчымым публічным прыніжэннем і парушэннем прыватнасці. Некаторыя жартуюць, што ўлады могуць канфіскоўваць ежу ў людзей на вуліцах, іншыя называюць кампанію «паляваннем на жываты».
«Уявіце, што вы ідзяце па вуліцы, яны спыняюць вас і кажуць: «Гэй, тоўсты, ідзі ў цэнтр», і канфіскуюць абаранак у вашай руцэ», — пажартаваў адзін карыстальнік.
Міністэрства аховы здароўя Турцыі пакуль не ўдакладніла, як будзе забяспечвацца добраахвотнасць удзелу ў праверках і як будзе абараняцца прыватнасць грамадзян.
Каментары