«Мамкін пястун». У Мінску адкрылася скандальная расійская дастаўка сушы — назвы страў эпатуюць
Дастаўка «Ёбідоёбі» запрацавала на Талбухіна. Для Беларусі франшыза распрацавала некалькі ўнікальных назваў сэтаў.
Скандальная расійская дастаўка сушы «Ёбідоёбі» пачала працаваць у Мінску. У Беларусі франшыза змяніла назву на «Ё сушы і ролы», але сайт усё роўна працуе пад шыльдай Yobidoyobi.
Канцэпцыя, праўда, засталася ранейшай. У Расіі сетка вядомая дзякуючы правакацыйным назвам сэтаў. У дастаўцы прыдумалі і пару ўнікальных страваў для Беларусі: у меню ёсць сэты «Сытая пыска» і «Мамкін пястун» (правільна на беларускай мове было б «мамчын»). Для іх і апісанні падрыхтавалі на беларускай. Сярод іншых назваў, «Kuni Men», «Ваху які», «Chpo Ki» і гэтак далей.
Мінск стаў чацвёртым горадам Беларусі, дзе пачала працаваць скандальная дастаўка: пункты ўжо адкрылі ў Гомелі, Магілёве і Мазыры. Франшыза плануе пашырацца і ў іншыя гарады.
Скандальны праект у 2016 годзе запусцілі прадпрымальнікі з Краснаярска Дзмітрый Прадзед і Канстанцін Зімен. Сетка часта аказваецца ў цэнтры медыйных скандалаў.
У сярэдзіне 2023 года кампанія прайграла суд з Федэральнай падатковай службай Расіі. Ведамства патрабавала, каб «Ёбідоёбі» змяніла сваю фірмовую назву, бо яна «сугучная з ненарматыўнай лексікай, мае непрыстойны сэнс і супярэчыць грамадскім інтарэсам і прынцыпам маралі».
Тым не менш такі падыход да маркетынгу аказаўся паспяховым. У кампаніі 82 партнёры і больш за 200 філіялаў у чатырох краінах свету, а гадавы абарот сеткі складае $75 млн.
Цяпер чытаюць
Міжнародны крымінальны суд пачаў расследаванне злачынстваў, здзейсненых рэжымам Лукашэнкі25
Каментары