Гомельскія актывісты дамагліся «беларусізацыі» мясцовага вакзала
Пасля рэканструкцыі будынка гомельскага аўтобуснага вакзала ў ім не засталося надпісаў на беларускай мове. Неабыякавыя жыхары горада і сябры мясцовага Таварыства беларускай мовы адразу звярнулі на гэта ўвагу кіраўніцтва ААТ «Гомельаблаўтатранс».
Варта адзначыць, што адказ ад чыноўнікаў прыйшоў даволі хутка, літаральна праз тыдзень. У «Гомельаблаўтатрансе» не толькі прыслухаліся, але і падзякавалі за клопат аб роднай мове. Прычым папера была складзеная па-беларуску.
«Дазвольце яшчэ раз выказаць вам удзячнасць і шчырыя словы падзякі за канструктыўную і своечасовую прапанову.
Дзякуючы вашай заўвазе кіраўніцтву аўтавакзала «Гомель» дадзеныя адпаведныя ўказанні, і ўжо да 2 кастрычніка будзе праведзеная работа па замене назвы аўтавакзала, будуць прадубляваныя на беларускай мове інфармацыйныя таблічкі.
Упэўненыя ў тым, што Ваш боль і клопат пра беларускую грамадзянскасць будзе служыць на карысць нашай Радзімы, незалежнасці і ўмацавання палітычных пазіцый на міжнароднай арэне», — гаворыцца ў лісце за подпісам Дзмітрыя Старасценкі, гендырэктара ААТ «Гомельаблаўтатранс».
Транспартнікі стрымалі слова. Па словах Марыі Булавінскай, старшыні гомельскага аб’яднання ТБМ, надпіс на вакзале сапраўды ўжо змянілі на беларускі.
Цяпер чытаюць
«Главное»: хто стаіць за найбольшай сеткай рэгіянальных тэлеграм-каналаў Беларусі. Яе сляды вядуць у Расію3
Каментары