Баравікі, бабкі, маслякі, апенькі… Па ўсёй Беларусі ўжо актыўна збіраюць грыбы
Пасля першых паведамленняў ад грыбнікоў-«прафесіяналаў» пра тое, што ў беларускіх лясах на гэтым тыдні з'явіліся «сапраўдныя» грыбы — баравікі, многія вырашылі пераканацца ў гэтым на свае вочы. У выніку да выхадных тыкток і тэматычныя «грыбныя» чаты і суполкі ў сацсетках аказаліся заваленыя відэа і фота не толькі баравікоў, але і першых чырвонагаловікаў, маслякоў і вяснова-летніх апенек, піша Telegraf.news.
Геаграфія грыбных знаходак аказалася вельмі разнастайнай. Так, энтузіясты з Мінскай вобласці ў адным з тэматычных тэлеграм-каналаў «Грыбы Беларусі» пахваліліся ўраджаем вяснова-летніх апенек.
Удзельнікі групы «Укантакце», у сваю чаргу, пахваліліся «ўраджаем» чырвонагаловікаў, якія ўдалося сабраць дзесьці ў Пухавіцкім раёне.
Мяркуючы па каментарах, асобныя чырвонагаловікі сустракаліся падчас «разведпрагулак» па лесе ўдзельнікам тэматычнай групы таксама ў Гомельскім і Мінскім раёнах.
Падзяліліся кадрамі з лесу і грыбнікі з Брэсцкай вобласці, якія таксама ўжо абвясцілі грыбны сезон адкрытым у сваім рэгіёне. Пры гэтым аўтарка відэа адзначыла, што асаблівага сэнсу «ламіцца ў лес» проста цяпер няма — першыя бабкі ёй сустрэліся ў лесапаласе, недалёка ад вадаёма.
Відэа з першымі баравікамі ў тыктоку падзяліліся грыбнікі з Барысаўскага раёна, а таксама іншых рэгіёнаў Мінскай вобласці.
А вось грыбнікам з Бабруйскага раёна, а таксама аднаго з рэгіёнаў Мінскай вобласці пашчасціла ў маі паласавацца свежымі маслякамі. У каментарах пад гэтымі відэа гледачы расказалі, што маслякі, а таксама баравікі ўжо таксама трапляюцца дзе-нідзе ў Лоеўскім раёне.
У сваю чаргу, заўзяты беларускі грыбнік Аляксандр Гарбацэвіч, які таксама не перастае дзяліцца сваімі грыбнымі знаходкамі, наглядна прадэманстраваў, чаму ў пагоні за грыбамі беларусам варта памятаць пра меры засцярогі. Паводле яго слоў, у аматараў першых летніх грыбоў у лесе ёсць «сур'ёзныя канкурэнты» ў асобе мядзведзяў — яны таксама не супраць паласавацца імі. У сэнсе грыбамі, а не грыбнікамі, але гэта ўжо залежыць ад абставін.
Цяпер чытаюць
Куды цяпер едуць вучыцца беларускія студэнты — топ краін і тэндэнцый8
Каментары