У Іспаніі пачынаецца вялікае даследаванне, для патрэбаў якога шукаюць 3 500 чалавек, якія будуць піць па шклянцы віна штодня на працягу чатырох гадоў. Гэтая навуковая работа — самая буйная ў свеце клінічная спроба вывучыць, як умеранае ўжыванне алкаголю ўплывае на здароўе, піша выданне Olive Press.
У даследаванні, якое вядзе Універсітэт Навары, возьмуць удзел 10 000 людзей ва ўзросце ад 50 да 75 гадоў. Навукоўцы будуць сачыць за тым, як штодзённае спажыванне віна, піва ці моцных напояў паўплывае на рызыку сардэчных хвароб, раку, псіхічных захворванняў і агульную працягласць жыцця.
Праект фінансуецца Еўрапейскай навуковай радай і мае бюджэт у 2,4 мільёна еўра. Кіруе даследаваннем прафесар Мігель Анхель Марцінэс-Гансалес, эксперт у галіне сардэчна-сасудзістай медыцыны.
Па стане на гэты момант у даследаванні ўжо ўдзельнічаюць 6 500 чалавек, і арганізатары шукаюць яшчэ 3 500 да чэрвеня 2025 года. Удзельнікі павінны быць жыхарамі Іспаніі, мужчынамі ва ўзросце 50-70 гадоў або жанчынамі 55-75 гадоў і рэгулярна ўжываць алкагольныя напоі.
Тыя, хто не ўжывае алкаголь ці мае супрацьпаказанні па здароўі, у даследаванне не прымаюцца.
Падчас даследавання ўдзельнікі будуць праходзіць анкетаванні, удзельнічаць у анлайн-сустрэчах з медыцынскімі спецыялістамі і праходзіць штогадовыя медагляды.
Праект падтрымліваюць больш за 500 спецыялістаў: дактары, дыетолагі і псіхолагі. Універсітэт Вальядаліда каардынуе даследаванне ў Кастыліі і Леоне і праводзіць асобнае даследаванне пра ўплыў алкаголю на якасць сну.
Гэты праект, як мяркуецца, дапаможа атрымаць надзейныя даныя пра ўплыў умеранага спажывання алкаголю на здароўе, каб лепш сфарміраваць медыцынскія рэкамендацыі ў будучыні.
Даследаванне не прапагандуе ўжыванне алкаголю, а імкнецца вызначыць, ці ёсць у ім карысць для здароўя ў памяркоўных колькасцях.
Цяпер чытаюць
У Эстоніі арыштаваны Алег Маісееў, кажуць яго знаёмыя. Гэта былы кіроўца Ціханоўскай, які з часам стаў яе зацятым крытыкам23
Каментары