У Еўропе донар спермы з мутацыяй, што выклікае рак, стаў бацькам 67 дзяцей
У Еўропе мужчына, чыя сперма выкарыстоўвалася для зачацця дзяцей, аказаўся носьбітам рэдкай генетычнай мутацыі, якая можа выклікаць рак. У выніку яго донарскай спермай былі зачатыя прынамсі 67 дзяцей у васьмі еўрапейскіх краінах. Дзесяць з іх ужо захварэлі на анкалагічныя хваробы, у тым ліку лейкоз і няходжкінскую лімфому, піша The Guardian.
Праблему выявілі пасля таго, як дзве сям’і паведамілі клінікам пра рак у сваіх дзяцей. Высветлілася, што сперма, якая паступіла з Еўрапейскага банка спермы, мела мутацыю ў гене TP53 — яна выклікае спадчыннае ракавае захворванне, вядомае як сіндром Лі-Фраўмэні.
На момант, калі мужчына стаў донарам у 2008 годзе, гэтую мутацыю яшчэ не ўключалі ў стандартныя генетычныя скрынінгі, бо яна не лічылася небяспечнай. Але пазней даследаванні паказалі, што 23 з 67 дзяцей атрымалі гэтую мутацыю. Сам донар пакуль застаецца здаровым.
Дзецям, у якіх выяўленая мутацыя, рэкамендуецца рэгулярна праходзіць поўнае МРТ-абследаванне цела і мозга, а ў дарослым узросце — таксама малочных залоз і брушной поласці.
Гэты выпадак падняў пытанне не толькі рызыкі атрымання ў спадчыну небяспечных мутацый, але і адсутнасці міжнародных абмежаванняў на колькасць дзяцей ад аднаго донара. Спецыялісты папярэджваюць, што гэта можа прывесці да сацыяльных і псіхалагічных наступстваў, асабліва калі адзін мужчына становіцца бацькам дзясяткаў дзяцей у розных краінах.
Таксама гэтая сітуацыя паказала, як цяжка адсачыць усе сем’і, звязаныя з адным донарам, у выпадку сур’ёзнай медыцынскай пагрозы.
Доктарка Эдвіж Каспер з Францыі заклікала ўвесці агульнаеўрапейскае абмежаванне на колькасць дзяцей або сем’яў, якіх можа мець адзін донар, каб пазбегнуць такога шырокага распаўсюджвання генетычных хвароб.
Каментары