Пракуратура Гомельскай вобласьці вынесла афіцыйнае папярэджаньне, сябру Беларускай асацыяцыі журналістаў Юнэлі (Юліі) Сальнікавай.

6 лютага Ю. Сальнікава была выкліканая ў пракуратуру паводле позвы начальніка аддзела агульнага нагляду Аляксандрам Елісеевым. Упраўленьне КДБ на Гомельскую вобласьць правяла праверку, у ходзе якой высьветлілася, што Ю.Сальнікава, ня маючы акрэдытацыі прадстаўніка замежнага СМІ, супрацоўнічае зь «Нямецкай хваляй» і «Радыё Рацыяй» — чым парушае пункт 9 Палажэньня аб працы карэспандэнтаў замежных СМІ , а таксама арт. 40 Закону аб друку. Для пераканаўчасьці сп. Сальнікавай былі прадэманстраваныя дыктафонныя запісы ейных рэпартажаў.

Таксама было зазначана, што Ю. Сальнікаву могуць прыцягнуць да адказнасьці паводле арт. 369‑1 Крымінальнага кодэкса (дыскрэдатацыя Рэспублікі Беларусь).

«Гэта ня першы выпадак, калі журналістам выносяць папярэджаньне за працу на замежныя СМІ без акрэдатыцыі. Некалі аналягічнае папярэджаньне вынесьлі карэспандэнту Радыё Свабода», — пракамэнтаваў падзеі намесьнік старшыні БАЖ Андрэй Бастунец.

«Але тут ёсьць супярэчнасьці. З аднаго боку, сапраўды, каб працаваць на замежныя СМІ, трэба мець акрэдытацыю МЗС, але канстытуцыя і міжнародныя пагадненьні, якія падпісала Беларусь, дазваляюць бесперашкодна перадаваць інфармацыю за мяжу, у тым ліку і ў замежныя СМІ, не пытаючыся на гэта дазволу каго б то ні было. Апроч таго, ня вызначана мера пакараньня за працу на замежныя СМІ».

Ці ня ёсьць гэтае папярэджаньне трывожным званочкам іншым карэспандэнтам «Радыё Рацыя, «Еўрапейскага радыё для Беларусі», «Радыё Свабода», некаторыя зь якіх працуюць без акрэдытацыі пры МЗС?

«Усё магчыма, — мяркуе Андрэй Бастунец. — Калі будзе загад, націск будзе працягвацца».

Клас
Панылы сорам
Ха-ха
Ого
Сумна
Абуральна