Хто тая адзіная жанчына, што прыйшла на матч «Дынама-Мінск» у Варшаве з чырвона-зялёным сцягам
На футбольны матч мінскага «Дынама» і польскай «Легіі», што адбыўся 7 лістапада ў Варшаве, беларусы прыйшлі з нацыянальнай сімволікай. На трыбунах былі бачныя бел-чырвона-белыя сцягі, а таксама плакаты з асуджэннем рэжыму Лукашэнкі і сілавікоў.
Аднак адна з фанатак вылучалася — у чырвона-зялёнай майцы, жанчына стаяла з афіцыйным сцягам у руках. Расказваем, што мы пра яе даведаліся.
Згодна з сервісамі пошуку па сацсетках, гэта 33-гадовая Таццяна. Родам яна з Бярозы, з простай сям'і.
Па звестках праекта Digital intelligence team, Таццяна ўсё жыццё працавала на розных заводах і прадпрыемствах на рабочых спецыяльнасцях, вартаўнічкай ва ўстанове адукацыі. Па сацсетках выглядае, што ў 2022 годзе яна паехала жыць у Польшчу да хлопца.
У яе падпісках пераважаюць суполкі з мемамі ды рэцэптамі. Сярод фота — адпачынак ды сустрэчы з сябрамі ды сваякамі.
Мужчына, які быў з ёй побач на матчы, — яе паляк-спадарожнік. Яго фота ёсць на матчах УЕФА ў 2018 годзе, там ён заўзее за Польшчу.
Блогер Аляксандр Івулін падышоў пазнаёміцца з жанчынай.
«Мяне пасля наб'юць гэтыя чырвона-белыя», — усміхаецца яна.
Расказвае, што беларуска, выйшла замуж за паляка.
Івулін спытаў жанчыну, чаму яна прыйшла на стадыён у такой форме.
«Таму што я нарадзілася, калі быў такі сцяг, і я хачу памерці з такім сцягам», — адказала яна.
«Ну вы амаль прыйшлі па адрасе», — жартуе Івулін.
«Я думаю, гэта магчыма апошні дзень майго жыцця», — смяецца ў адказ жанчына.
Яна расказала, што нарадзілася ў 1991-м.
«Вы не пад гэтым сцягам нарадзіліся», — заўважыў Івулін. Афіцыйны чырвона-зялёны сцяг быў зацверджаны ў 1995-м, пасля распаду СССР з 1991-га сцягам Беларусі быў бел-чырвона-белы.
Жанчына спрабавала паспрачацца.
«Але наогул якая розніца, — сказала ў выніку. — У Беларусі не можа быць іншага сцяга».
Івулін спытаў, за каго з футбалістаў заўзее новая знаёмая.
«Хто найлепшы футбаліст — без паняцця. (…)Я агулам працую…» — запнулася жанчына.
«Вы працуеце сёння. Вы ўсё правільна сказалі», — з усмешкай падлавіў яе Івулін.
Ва ўчорашнім матчы Лігі канферэнцый беларускі клуб разгромна саступіў польскаму — 0:4.
«Наша Нiва» — бастыён беларушчыны
ПАДТРЫМАЦЬ
Цяпер чытаюць
Памятаеце асабістага пілота Лукашэнкі, які трапіў у турму? Вось як склаўся яго лёс2
Каментары