U centry ŭvahi biełaruskich pasłoŭ

MZS čakajuć kadravyja ratacyi na ministerskim i pasolskim uzroŭni. Tamu siarod svaich hałoŭnych zadač kiraŭniki MZS i biełaruskija pasły najbolš abmiarkoŭvali na mienskim seminary perspektyvy najbližejšaj budučyni.

Jak zapeŭnili ŭ MZS, ciapierašniaja prahrama vučoby dyplamataŭ, što prachodzić padčas ich letnich adpačynkaŭ, maje bolš prykładny, čym tearetyčny charaktar. Pierad tym jak zvazić na ajčynnyja pradpryjemstvy, kiraŭnikam zamiežnych ustanoŭ, bolšaść ź jakich majuć ranh nadzvyčajnaha i paŭnamocnaha pasła, stavili na mienskim seminary novyja zadačy ŭ zamiežnapalityčnaj i ekanamičnaj dziejnaści Biełarusi. Zadačy hetyja ahučvali rektar Akademii kiravańnia pry prezydencie Stanisłaŭ Kniazieŭ, ministar zamiežnych spraŭ Siarhiej Martynaŭ, namieśnik ministra ekanomiki Andrej Tur. Nakolki ich bačańnie mižnarodnych realij i perspektyŭ dla Biełarusi supadała z tym, što bačać i adčuvajuć u svajoj štodzionnaj zamiežnaj rabocie biełaruskija dyplamaty, skazać ciažka.

Budučy eŭrapiejskaj krainaj, Biełaruś sa svaim kiraŭnictvam praciahvaje pahłyblacca ŭ zamiežnapalityčnuju izalacyju ŭ Eŭropie.

Apošnim časam nazirajecca ŭskładnieńnie dvuchbakovych dačynieńniaŭ z susiedkami — Polščaj i Ŭkrainaj, i pra heta adkryta havorycca na samym vysokim uzroŭni. Ujaŭlajecca sprečnym mierkavańnie, što možna raźvivać handlova-ekanamičnyja dačynieńni biez palityčnych. Što heta daloka nia tak, śviedčyć niadaŭniaje rašeńnie Eŭrakamisii pačać manitorynh sytuacyi ŭ Biełarusi, vynikam jakoha moža być pazbaŭleńnie preferencyj na eŭrapiejskim rynku biełaruskaj pradukcyi. U Miensku pryznajuć, što heta stanie adčuvalnaj strataj dla biełaruskaj ekanomiki. I što b ni kazali na temu «palityka asobna, ekanomika asobna» ŭ Varšavie i Vilni, pavieličeńnie žorstkaści palityki Bruselu ŭ dačynieńni da Miensku pavinna ŭpłyvać i na ŭsiebakovuju palityku astatnich členaŭ ES. A prahnazavanaje ŭzmacnieńnie transatlantyčnaj salidarnaści EZ i ZŠA jašče bolš nadaje ŭpeŭnienaści takim perspektyvam adnosna ciapierašniaha biełaruskaha režymu.

Ujaŭlajecca imaviernym, što mienavita takoha rodu razvahi mahli być u centry ŭvahi biełaruskich pasłoŭ, što sabralisia na vučobu ŭ Miensku. Asabliva kali im davodziłasia kantaktavać z kaleham Uładzimieram Siańkom, što pryjechaŭ z Bruselu. Pra jakija pośpiechi miralubnaj zamiežnaj palityki Biełarusi moh by jon raskazać, akazaŭšysia «zažyva pachavanym na mnohija hady ŭdalečyni ad radzimy? Mała chto ŭžo pomnić, što Ŭładzimier Siańko byŭ pieršym ministram zamiežnych spraŭ u Łukašenki. Mienavita z prafesijanalizmam Siańka niekali źviazvalisia zamiežnapalityčnyja nadziei suverennaj Biełarusi. Siońnia biełaruskija pasły nia tolki ŭ Bruseli, ale i ŭ Paryžy, Londanie, nie havoračy ŭžo pra Vašynhton, bolš vystupajuć u roli niamych statystaŭ, čym dziejučych dyplamataŭ. Jak ujaŭlajecca, paśla vosieńskich vybaraŭ u Niamieččynie i Polščy kahorta takich statystaŭ papoŭnicca.

Darečy, u kuluarach udzielnikaŭ mienskaha seminaru dla pasłoŭ cyrkulavała i tema pra karjeru pasła ŭ Varšavie. Kažuć, Pavał Łatuška fihuruje siarod kandydataŭ na pasadu pieršaha namieśnika ministra zamiežnych spraŭ. A ciapierašniaha pieršaha namieśnika Vasila Puhačova źbirajucca adpravić pasłom u Budapešt. Niekali, pavodle zadumki aficyjnaha Miensku, mienavita z Budapeštu pavinna była ažyćciaŭlacca ahresiŭnaja zamiežnaekanamičnaja dziejnaść Biełarusi ŭ bałkanskim rehijonie. Ciapier, zdajecca, jaje niejak sprabuje ažyćciaŭlać pasoł u Białhradzie Ŭładzimier Mackievič. Jon navat vyvučyŭ serbskuju movu.

Prymietnaj padziejaj u MZS moža stać i planavanaja zamiena ŭ pradstaŭnictvie AAN u Ženevie. Novym kiraŭnikom hetaha pradstaŭnictva pavinien stać ciapier hałoŭny prezydencki pamočnik, kadravy dyplamat Uładzimier Makiej. I ŭ Maskvie ŭžo pakuje valizki pasoł-doŭhažychar Uładzimier Hryhorjeŭ. Tolki voś nie zusim zrazumieła, ci źbirajecca jon viarnucca damoŭ, ci, pa prykładzie svajho papiarednika ŭ abžytoj Maskvie, zastacca. A na miescy Hryhorjeva, ličać niekatoryja dyplamaty, pasłom u Rasiei moža akazacca niechta z členaŭ biełaruskaha ŭradu, zdolny havaryć na zrazumiełaj movie z kramloŭskimi liberał-ekanamistami. Siarod takich postaciaŭ nazyvajuć vice-premjera Andreja Kabiakova.

Ale ŭ centry ŭvahi biełaruskich pasłoŭ, dyj nia tolki ich, praciahvaje kanfidencyjna abmiarkoŭvacca tema budučyni novaha kiraŭnika zamiežnapalityčnaha viedamstva Biełarusi. Całkam mahčyma, što Siarhieja Martynava moža źmianić nia kadravy dyplamat. Naprykład, ciapierašni ministar infarmacyi Ŭładzimier Rusakievič. Praŭda, vopyt dyplamatyčnaj raboty jon usio ž maje. Byŭ pasłom Biełarusi ŭ Kitai. I aparatnyja spravy MZS dla jaho nie čužyja. Varta pryhadać, što, budučy pieršym namieśnikam kiraŭnika prezydenckaj administracyi, Uładzimier Rusakievič uznačalvaŭ kamisiju pa praviercy raboty MZS. Vynikam jaje dziejnaści stała zvalnieńnie ministra Ivana Antanoviča. I «maŭr», zrabiŭšy svaju spravu, vidać, u padziaku, byŭ adpraŭleny ŭ daloki Pekin. Tak što, mabyć, novamu kiraŭniku MZS Biełarusi całkam moža spatrebicca kitajski vopyt pracy… A što da ciapierašniaha ministra Martynava, dyk jaho praciahły vopyt raboty ŭ ZŠA i niepraciahły — pasłom u Bruseli moža być zapatrabavany šlacham viartańnia ŭ Brusel. U biełaruskaj praktycy kiravańnia kadrami mahčyma nia tolki viartańnie ŭ ministerskaje, ale i pasolskaje kresła. Zrešty, usich hetych «razborak» čakajuć nie ciapier, a nastupnaj vosieńniu, napiaredadni važnych palityčnych padziej. U 2006 hodzie ŭ Biełarusi pavinny adbycca Ŭsiebiełaruski narodny schod i prezydenckija vybary. I amal niemahčyma navat ujavić sabie, što niejkaja hrupa biełaruskich dyplamataŭ, kiraŭnikoŭ zamiežnych ustanoŭ moža publična vystupić na baku nie taho kandydata ŭ prezydenty. Jak heta minułaj vosieńniu adbyłosia va Ŭkrainie.

Ale, jak zapeŭnivajuć niekatoryja scenarysty, Biełaruś čakaje ŭłasny cikavy siužet na zadadzienuju temu. Adny havorać, što ŭ im budzie daminavać «vulica». Druhija — što niejkija aparatnyja kambinacyi.

∎

Siarhieja Martynava na pasadzie ministra moža źmianić ciapierašni ministar infarmacyi Ŭładzimier Rusakievič.

Pavał Łatuška fihuruje siarod kandydataŭ na pasadu pieršaha namieśnika ministra zamiežnych spraŭ.

Ciapierašniaha pieršaha namieśnika Vasila Puhačova źbirajucca adpravić pasłom u Budapešt.

Novym kiraŭnikom pradstaŭnictva Biełarusi pry AAN u Ženevie moža stać hałoŭny prezydencki pamočnik Uładzimier Makiej.

Pasłom u Rasieju moža pajechać niechta z uradu, naprykład, vice-premjer Andrej Kabiakoŭ.

• 0
• 0
• 0
• 0
• 0
• 0
• 0
• 0