Zakryćcio Ameryki

11 vieraśnia ŭ Ńju-Jorku zaviaršyŭsia adkryty čempijanat ZŠA pa tenisie, apošni turnir hodu z seryi «Vialikaha šlema». Biełaruskija zaŭziatary mieli nadziei na toje, što Maksu Mirnamu ŭdasca atrymać pieršuju pieramohu na hetym turniry ŭ parnym razradzie.

Taksama mielisia i niekatoryja spadzievy, što na kortach Fłešyn Medoŭz adbudziecca čaroŭnaje adradžeńnie vialikaha bajca Ŭładzimiera Vaŭčkova. Adnak ni pieršaha, ni druhoha nie adbyłosia. Piša Andranik Antanian.

Uładzimier Vaŭčkoŭ nia zdoleŭ prabicca cieraź sita kvalifikacyjnaha adboru, i vyhladaje, što karjera hetaha tenisista, aŭtara samaha značnaha dasiahnieńnia ŭ historyi biełaruskaha mužčynskaha tenisu — vychadu ŭ paŭfinał adzinočnaha razradu na turniry va Ŭimebłdanie — niaŭmolna idzie da zaviaršeńnia. Toje, što jaho dasiahnieńni buduć paŭtorany ŭ najbližejšaj budučyni kim-niebudź ź biełaruskich spartoŭcaŭ, vyhladaje małaimaviernym.

Mirny, jaki sioleta pakazvaje stabilnuju hulniu, sastupiŭ u trecim raŭndzie persanalnaha razradu ŭ čatyroch setach finu Jarka Nijeminenu. Vynik sustrečy nielha nazvać niečakanym. Choć finski tenisist nia chodzić siarod lideraŭ i letaś Maks jaho dvojčy rašuča pieramahaŭ, tym nia mienš laŭšun, što lepš pačuvajecca ŭ abaronie i kontratakach, źjaŭlajecca tenisistam takoha typu, u hulni ź jakimi prychilnik žorstkaj ataki Mirny nie adčuvaje siabie ŭpeŭniena.

Kudy bolšyja nadziei ŭskładalisia ŭ nas na paru Bjorkman—Mirny. Biełaruska-švedzki duet, jaki skłaŭsia sioleta, demanstruje ŭpeŭnienuju hulniu i ŭžo pieramahaŭ na kortach «Ralan Harosu», a taksama na turnirach seryi «Masterz» u Majami, Hamburhu i Cyncynaci ličyŭsia adnym z favarytaŭ u mužčynskich parnych spabornictvach. Svoj status jany i paćvierdzili vychadam u finał, dzie sustrelisia z amerykanskaj paraj, składzienaj z bratoŭ Brajanaŭ. Kalasalnaja zhulanaść kalifarnijcaŭ, jakija ŭsiu ŭvahu kancentrujuć na vystupie mienavita ŭ hetaj dyscyplinie, pryniesła vynik — 6:1, 6:4. Biełaruska-švedzkaja para zdoleła pravieści ŭsiaho niekalki pryhožych rozyhryšaŭ, za jakija chacia i nie dajuć dadatkovyja bały (ci hrošy), ale jakimi tenis i pryciahvaje da siabie ŭvahu hledačoŭ.

U žanočaj pałovie spabornictvaŭ nichto ź biełarusak nia zdoleŭ prabicca ŭ asnoŭny turnir. Peŭnuju padstavu dla radaści pryniesła pieramoha Viktoryi Azaranki ŭ junijorskim turniry. Adnak tym zaŭziataram, jakija ŭžo pačali ličyć dni da času, kali talenavitaja biełaruska pačnie hramić supiernic na vialikich turnirach dla «darosłych», varta ŭsio ž pabierahčy svoj zapał. Pierachod ź junijorskaha ŭ prafesijny tenis nie zaŭsiody byvaje hładkim ci takim, jakim jon bačycca treneru i (abo) baćkam tenisistki. Toje, što ty hramiš svaich adnahodkaŭ u padletkavym uzroście, zusim nie harantuje taho, što ŭ ciabie atrymajecca vieści na roŭnych razmovu ź ludźmi, jakija viedajuć pra tenis usio i svaje viedy mohuć jašče realizavać na korcie. Ale jak ža biez nadziej žyć zaŭziataram?

Asnoŭnaj intryhaj mužčynskaha turniru było pytańnie, ci zdoleje chto-niebudź spynić pieramožny postup švajcarca Rodžera Federera, jaki ŭ hetym sezonie pravioŭ 74 matčy i ŭ 71 ź ich śviatkavaŭ pieramohu. Vynik ašałamlalny. Švajcarski tenisist upeŭniena ruchaŭsia pa turnirnaj sietcy i najbolšyja prablemy mieŭ chiba ŭ 1/8 finału ŭ hulni suprać niamieckaha tenisista Nikałasa Kifera. U astatnich vypadkach lider sezonu hulaŭ na paradak vastrej i pry hetym stabilniej za svaich apanentaŭ. Jaho supiernikam u finale staŭ lehiendarny Andre Ahasi, čyjo vystupleńnie na turniry ŭ Ńju-Jorku stała dvaccatym u karjery. Žyvaja lehienda tenisu, adzin z najstarejšych hulcoŭ u prafesijnym tury ciaham usiaho svajho šlachu da finału nie pakazvaŭ toj hulni, jakaja dazvoliła jamu na praciahu doŭhaj i plonnaj karjery atrymać pieramohi va ŭsich čatyroch turach z seryi «Vialikaha šlemu», adnak kalasalny dośvied dazvalaŭ amerykancu ŭ samyja adkaznyja momanty hulni pravodzić rozyhryšy na absalutnaj kancentracyi i pieramahać nad supiernikami, jakija pakazvali bolš pryvabny i, zdavałasia, bolš vynikovy tenis. Mienavita takim čynam byli im atrymany pieramohi ŭ piaci setach nad belhijcam Ksavje Malisam i ziemlakom Džejsam Błejkam, jaki pa chodzie turniru pakazvaŭ śpiełuju i adnačasova azartnuju hulniu.

Nadziei tych, chto spadziavaŭsia, što dośvied veterana tenisu dazvolić znajści dziejsnyja srodki suprać švajcarca, byli apraŭdany častkova — u pieršych troch setach finalnaj sustrečy. Ale paśla taj-brejku treciaha setu, jaki ŭpeŭniena ŭziaŭ Federer, stała zrazumieła, što kali i jość na siońniašni dzień tenisist, zdolny pieramahčy hetaha spartoŭca, to jaho proźvišča nie Ahasi. 6:3, 2:6, 7:6 (1), 6:1 — taki vynik zafiksavany ŭ aficyjnym pratakole matču, i Rodžer Federer druhi raz zapar staŭ pieramožcam Adkrytaha čempijanatu Ameryki.

Na spabornictvach siarod žančyn pieramohu śviatkavała belhijka Klim Klisterz, jakaja ŭpeŭniena pieramahła ŭ dvuch setach francužanku Mery Pirz.

Admietnaściu hetaha turniru, vidavočna, stała toje, što ŭ finały ŭ mužčynskim i žanočym razra-dzie vyjšli tenisisty, čyj uźlot spartovaj karjery prypaŭ na pačatak-siaredzinu 1990-ch. A kali dadać jašče vychad u paŭfinał u parnym razradzie Marciny Naŭraciłavaj, jakoj nieŭzabavie spoŭnicca 49 (!) hadoŭ i čyja jaskravaja prafesijnaja spartovaja karjera pačałasia ŭ pieršaj pałovie 1970-ch, to vymaloŭvajecca davoli paradaksalnaja karcina: hady iduć, źmianiajecca inventar, miesca tenisu ŭ masavaj śviadomaści, urešcie, metodyki padrychtoŭki atletaŭ, a Andre Ahasi i Marcina Naŭraciłava jašče ŭ stanie prademanstravać maładym pakaleńniam spartoŭcaŭ svaju siłu na korcie.

Turnir u Ńju-Jorku źjaŭlajecca kulminacyjnym u kalendary prafesijnaha turu. Adnak biełaruskich amataraŭ praz dva tydni čakaje jašče adna važnaja padzieja. 23—25 vieraśnia ŭ Taronta pavinien prajści matč na Kubak Devisa pamiž mužčynskimi zbornymi Biełarusi i Kanady za prava viarnucca ŭ Suśvietnuju hrupu hetaha prestyžnaha spabornictva. Kanadzkija tenisisty nie zaŭvažany navat siarod sotni macniejšych tenisitaŭ planety, i asablivych pośpiechaŭ u Kubku Devisa ŭ apošnija dziesiacihodździ hetaja kamanda nia mieła.

Adnak usio vyšejpieraličanaje nie źjaŭlajecca harantyjaj taho, što pajezdka ŭ Taronta stanie lohkaj prahułkaj dla biełaruskaj družyny. Tolki M.Mirny vidavočna pieraŭzychodzić klasam svaich budučych apanentaŭ. U.Vaŭčkoŭ užo nia pieršy sezon nia moža znajści svaju hulniu i vyvieści siabie na kaliści zavajavanyja rubiažy (praŭda, heta zusim nie zaminaje jamu časam bliskuča vystupać za nacyjanalnuju zbornuju). Ale za śpinami hetych biezumoŭnych lidaraŭ biełaruskaha tenisu za apošniaje dziesiacihodździe tak i nia vyrasła spartoŭcaŭ, zdolnych vystupić hodna na turnirach padobnaha ŭzroŭniu, što robić kančatkovy vynik vielmi zaležnym ad taho, u jakoj formie padyduć da hetaha matču Maks Mirny i Ŭładzimier Vaŭčkoŭ.

• 0
• 0
• 0
• 0
• 0
• 0
• 0
• 0