U 1/16 finału Lihi Jeŭropy BATE zhulaje ź lubimym kłubam Ataciurka

Siońnia ŭ šviejcarskim Ńjonie prajšło losavańnie 1/16 finału Lihi Jeŭropy, kudy z 3-ha miesca ŭ hrupavym turniry Lihi čempijonaŭ vyjšaŭ barysaŭski BATE.

U 1/16 finału BATE zhulaje z tureckim «Fienierbachče».

Pieršy matč 14 lutaha ŭ Hrodnie, matč u adkaz — 21 lutaha ŭ Stambule.

«Fienierbachče» — słavuty stambulski kłub, 18-razovy čempijon Turcyi. Cikava, što bazujecca ŭ azijackaj častcy Stambuła.

***

BATE dva hady tamu, u lutym 2011 h., hulaŭ u 1/16 płej-of Lihi Jeŭropy, dzie pa sumie dvuch matčach sastupiŭ PSŽ (2:2, 0:0).

Finał Lihi Jeŭropy projdzie 15 maja 2013 h. na «Amsterdamie-Arenie».

Nahadajem, što, a 14-j u Ńjonie prajšło losavańnie 1/8 finału Lihi čempijonaŭ.

BATE u hrupavym raŭndzie Lihi čempijonaŭ hulaŭ u adnoj hrupie z «Bavaryjaj», «Valensijaj» i «Lilem» dy zaniaŭ 3-je miesca.

***

U Stambule jość vialikaja trojka kamand — «Hałatasaraj», «Biešyktaš» i naš budučy supiernik «Fienierbachče». Kamandu jašče časam nazyvajuć «žoŭtyja kanarejki».

«Fienierbachče» vasiamnaccać razoŭ stanaviŭsia čempijonam Turcyi pa futbole. Apošni raz u 2011 hodzie.

Kłub zasnavany bolš za sto hadoŭ tamu — u 1907. Chacia karaniami sychodzić jašče raniej, u kaniec XIX stahodździa, ale lehalizavacca tady było składana, bo sułtan Turcyi vystupaŭ suprać usialakich zboram ludziej pa intaresach, bo ličyŭ heta pahrozaj manarchii.

A voś zasnavalnik Tureckaj respubliki Mustafa Kiemal Ataciurk byŭ prychilnikam jakraz «Fienierbachče».

U 1928 hodzie jon padčas hulni «Hałatasaraja» i «Fienierbachče» jon siadzieŭ pobač z tryma prychilnikami pieršaha kłuba, i dvuma — «Fienierbachče». «Nas roŭnaja kolkaść. Try na try, — skazaŭ lidar. — Bo ja taksama za «Fienierbachče».

Potym Ataciurk dapamahaŭ kłubu, kali zhareŭ ich ofis.

Da 1959 «Fienierbachče» vystupaŭ u Stambulskaj futbolnaj lizie. A paśla była zasnavanaja abjadnanaja tureckaja liha, paŭnavartasny čempijanat, pieršym čempijonam byŭ jakraz «Fienierbachče».

Turecki, a asabliva stambulski futboł, viadomy krutym noravam zaŭziataraŭ. Atmaśfieru stadyjonaŭ u Turcyi pryjezdžyja kamandy paraŭnoŭvajuć ź piekłam. Lohka BATE i jaho fanatam jaŭna nie budzie.

Ź viadomych futbalistaŭ za «Fienierbachče» hulajuć varatar Vałkan Demierel, słavak Mirasłaŭ Stoch, partuhalec Raŭl Mejreleš, hałandziec Dzirk Kiujt.

BATE z tureckimi kłubami pakul nie hulaŭ nikoli.

Za časami niezaležnaści ŭsio toje ž minskaje «Dynama» prajhrała «Biešyktašu», «Minsk» — «Hazieantiepsporu», «Homiel» — «Bursasporu».

• 0
• 0
• 0
• 0
• 0
• 0
• 0
• 0