Nastup USU na Alaksandraŭskim kirunku: što pra jaho viadoma i jakija pierśpiektyvy

Pieršy etap apieracyi USU na Alaksandraŭskim kirunku pačaŭsia 29 studzienia. Na toj momant rasijskija vojski, jakija ŭletku 2025 hoda ŭvarvalisia ŭ Dnieprapiatroŭskuju vobłaść, nabližalisia da važnaha z łahistyčnaha punktu hledžańnia pasiołka Pakroŭskaje (nie błytać z Pakroŭskam u Danieckaj vobłaści) i jaho paŭdniovaj uskrainy — siała Alaksandraŭka.

Adnačasova armija RF viała nastupalnyja dziejańni na fłanhach, namahajučysia paŭnočniej na Dnieprapiatroŭščynie zachapić pasiołki Vialikamichajłaŭka i Navapaŭłaŭka, a paŭdnioviej — nasielenyja punkty ŭ Zaparožskaj vobłaści kala Hulajpola.

Kali b rasijanam udaŭsia zadumany płan, to jany b mahli abvalić abaronu ŭkrainskaha ŭmacavanaha rajona ŭ Arechavie i praryvacca na bližnija podstupy z uschodu da Zaparožža.

Pavialičyć

Kab sarvać płany Rasii, ukrainskaje vajskovaje kamandavańnie raspracavała i pačało kontrnastupalnuju apieracyju na hetym adrezku. Pieršaja jaje častka tryvała z kanca studzienia da krasavika, a druhaja — z 5 maja da pačatku žniŭnia.

Apieracyja praviedziena siłami čatyroch bryhad desantna-šturmavych vojskaŭ i dvuch šturmavych pałkoŭ.

Što ŭdałosia vyzvalić

Pavodle słoŭ hałoŭnakamandujučaha USU, hienierał-majora Michaiła Drapataha, padčas pieršaha etapu nastupalnaj apieracyi ŭdałosia vyzvalić terytoryju płoščaj 450 kv. km, padčas druhoha — 490 kv. km.

Uvohule za čas nastupu ŭdałosia ŭziać pad kantrol 745 kv. km i začyścić ad rasijskich infiltravanych hrup kala 300 kv. km u tyle terytoryi, kaža ŭkrainskaja ŭłada.

Vyzvalena było, zhodna z zajavaj, 26 siołaŭ, a mienavita 12 u Dnieprapiatroŭskaj vobłaści (Malijeŭka, Sičnievaje, Stepavaje, Kalinaŭskaje, Biarozavaje, Navamikałajeŭka, Zaparožskaje, Złahada, Pryvolle, Cahielnaje, Ciarnovaje, Navahieorhijeŭka), 10 — u Danieckaj vobłaści (Toŭstaje, Navachackaje, Zielony Haj, Zorka, Paddubnaje, Mirnaje, Alaksandrahrad, Hrušaŭskaje, Jałta, Vaskrasienka), 4 — u Zaparožskaj vobłaści (Rybnaje, Novahryhoraŭka, Krasnahorskaje, Pryvolnaje).

Apieracyja dazvoliła Siłam abarony Ukrainy vybić praciŭnika z Dnieprapiatroŭskaj vobłaści (pad jaho kantrolem nie zastałosia nasielenych punktaŭ, ale zhodna z kartaj DeepState, dnieprapiatroŭskaje siało Filija ŭsio jašče zastajecca ŭ «šeraj zonie»).

Pavialičyć

Jana taksama źniała pahrozu nastupu na Zaparožža ŭzdoŭž trasy Danieck — Zaparožža.

Rasija zajavy pra pośpiech nastupu USU na Alaksandraŭskim kirunku nie kamientavała. Ale varta adznačyć, što ministerstva abarony Rasii na praciahu viasny i leta praciahvała rapartavać pra svajo «prasoŭvańnie» ŭ Dnieprapiatroŭskaj vobłaści.

Bolš za toje, 3 lipienia ministerstva abviaściła pra ŭziaćcie pasiołka Alaksandraŭka (ułasna ad jaho i pajšła nazva hetaha kirunku). Na paćviardžeńnie svaich słoŭ RF pakazała videa z adnym vajskoŭcam, jaki razhortvaje rasijski ściah na vulicy nasielenaha punkta.

Na praciahu červienia — lipienia rasijanie taksama adspravazdačylisia pra ŭziaćcie jašče šerahu susiednich siołaŭ, a mienavita Pisancaŭ, Novaskielavataha, Bahadaraŭki, Volnaha, Chrystaforaŭki (papiaredniaja nazva Kamunaraŭka), Dabrapasava, Błahadatnaha.

Takim čynam, pa viersii Kramla, heta jany zmahli praryvać ukrainskuju abaronu na Dnieprapiatroŭščynie, a nie USU vybili ich z hetych pazicyj.

Zamiežnyja OSINT-analityki, naprykład «Instytut vyvučeńnia vajny» (ISW), adviarhajuć hetyja śćviardžeńni i zajaŭlajuć, što zajavy Rasii pra kantrol terytoryi nie adpaviadajuć rečaisnaści.

Prychavanaja apieracyja

Dla razumieńnia, hetyja nasielenyja punkty — na adlehłaści 20—25 km ad ciapierašniaj linii frontu.

Pavodle słoŭ ukrainskich vajskoŭcaŭ, praciŭnik nie maje i nie mieŭ kantrolu nad hetymi siołami, a zdymaŭ prapahandysckija videa sa ściahami paśla infiltracyi 1—2 bajcoŭ u tył pazicyj USU, paśla čaho hetyja vajskoŭcy Rasii źniščalisia, a zamacavańnia na terytoryi nie adbyvałasia.

Navierch rasijskaje kamandavańnie padavała niepraŭdzivuju infarmacyju pra svajo prasoŭvańnie, kaža kamandzir 95‑j bryhady DŠV USU, pałkoŭnik Rusłan Maryšaŭ, jaki biare ŭdzieł u hetym nastupie.

«Šmat kamandziraŭ RF padmanvali svajo vyšejšaje kiraŭnictva, dajučy niepraŭdzivuju infarmacyju pra ich piaredni kraj — dzie jon faktyčna znachodzicca. Navat kali my byli ŭžo paradka 20—25 km u hłybiniu abarony rasijskich vojskaŭ, to ich kiraŭnictva ŭ heta nie vieryła i davała karty, jakija my ŭ ich zabirali, dastavali… (na kartach było pakazana), što jany na 25 km u našym tyle», — adznačyŭ jon u intervju telekanału «1+1».

U svaju čarhu, ukrainskaje kamandavańnie doŭhi čas nie raskryvała padrabiaznaści prasoŭvańnia Sił abarony publična.

Paśla pieršaha etapu apieracyi ŭviesnu vajskovyja kamandziry, u tym liku kamandujučy DŠV, raskryli tolki ahulnyja ličby pra kolkaść nasielenych punktaŭ i płošču vyzvalenych terytoryj.

Pavialičyć

Takim čynam, realnaje miescaznachodžańnie ŁBS (linii bajavoha sudakranańnia) dla rasijskich vajskoŭcaŭ na hetym kirunku stała siurpryzam, kaža pałkoŭnik Maryšaŭ.

Jak prykład hetaha jon pryvodzić situacyju, kali padnačalenyja zmahli zabić u blizkim bai kamandzira rasijskaha motastrałkovaha bataljona, jaki praviaraŭ pazicyi. Jon nie raźličvaŭ, što ŭkrainskaja armija prasunułasia tak blizka da jaho pazicyj.

Niepubličnaść nastupalnaj apieracyi dazvoliła joj za niapoŭnych paŭhoda dasiahnuć značnych vynikaŭ. Jakich mienavita?

Jašče adzin ryvok

Faktyčnaje vybićcio rasijskich vojskaŭ z Dnieprapiatroŭščyny — heta bolš palityčny vynik.

A voś u vajennym płanie važnym źjaŭlajecca nabližeńnie USU da łahistyčnych šlachoŭ, jakija vykarystoŭvaje rasijskaja armija na Poŭdni.

Tak, pa stanie na 13 žniŭnia ŭkrainskija vajskoŭcy znachodziacca za 3—4 km ad darohi Vialikaja Navasiołka — Hulajpole i praciahvajuć cisnuć u hetym kirunku kala viosak Uśpienaŭka i Ciamiraŭka.

To-bok hety šlach, važny dla łahistyki rasijskaj hrupoŭki, užo nie źjaŭlajecca biaśpiečnym. Heta prymušaje rasijan šukać inšyja maršruty dla padvozu charčavańnia, bojeprypasaŭ i asabovaha składu, asabliva pobač z Hulajpolem, jakoje jany zachapili naprykancy minułaha hoda.

Akramia hetaha, USU zmahli zaviazać bai za siało Kamar, jakoje staić na bierazie raki Mokryja Jały, za 15 km na poŭnač ad Vialikaj Navasiołki.

Hety vialiki pasiołak rasijanie zachapili naprykancy zimy 2025 hoda i pieratvaryli ŭ aporny punkt.

Pavialičyć

Vajskovy analityk hrupy «Infarmacyjny supraciŭ» Kanstancin Mašaviec źviartaje ŭvahu, što ŭkrainskim siłam nieabchodna pieraadoleć jašče niekalki kiłamietraŭ (pryblizna 5—6 km da siałai Volnaje Pole), kab nablizicca na adlehłaść ustalavańnia ahniavoha kantrolu nad Vialikaj Navasiołkaj.

«U takim razie dla taho, kab dasiahnuć istotnaha apieratyŭnaha efiektu va ŭsioj apieracyjnaj zonie rasijskaj hrupoŭki vojskaŭ «Uschod»… ukrainskamu kamandavańniu navat nie treba budzie atakavać / šturmavać samu Vialikuju Navasiołku», — adznačaje ekśpiert.

«Dastatkova prosta ŭziać pad ščylny ahniavy kantrol (u tym liku dronami) uvieś hety rajon i tuju častku darohi Hulajpole — Vialikaja Navasiołka, jakaja viadzie na zachad. Dystancyja 7,5—7,7 km dazvalaje heta zrabić davoli efiektyŭna», — ličyć jon.

Takoje prasoŭvańnie pryviadzie da ŭskładnieńnia rasijskaj łahistyki na Poŭdni, a heta paŭpłyvaje na bajazdolnaść čaściej US RF i paspryjaje prypynieńniu ich nastupu na Arechaŭ.

To-bok, kab pastavić praciŭnika ŭ krytyčnaje stanovišča, Siłam abarony Ukrainy nieabchodna praciahnuć nastup i zrabić jašče adzin «ryvok» na 5—10 km.

Ci zmohuć USU dasiahnuć takoha efiektu najbližejšym časam bieź pierakidańnia reziervaŭ — adkrytaje pytańnie.

Taksama nieviadoma, ci hatovaje rasijskaje kamandavańnie pierakidać dadatkovyja siły dla prypynieńnia praciŭnika na hetym kirunku, jaki vidavočna nie źjaŭlajecca dla Kramla pryjarytetnym na hety momant.

• 0
• 0
• 0
• 0
• 0
• 0
• 0
• 0