Arhanizatary biełaruskaha TEDx u Varšavie dahetul nie atrymali hrošy za pradadzienyja kvitki — kampanija biełarusa zatrymlivaje ich užo 4 miesiacy

TEDx Ulica Mińska arhanizoŭvali pa licenzii TED Conferences — farmata niekamiercyjnych kanfierencyj, dzie śpikiery dzielacca cikavymi idejami z navuki, śfiery technałohij, mastactva i biznesu, a to i prosta z ułasnaha dośviedu. Na krasavickim TEDx Ulica Mińska vystupali, naprykład, Arkadź Dobkin, Leŭ Lvoŭski, Ryhor Astapienia — usiaho 12 śpikieraŭ z roznych śfier.

Kvitki na padzieju pradavali praz płatformu Relivent. Pakolki heta niekamiercyjnaja kanfierencyja, hrošy za kvitki byli patrebnyja, kab akupić pracu padradčykaŭ — naprykład, apłacić arendu placoŭki i vytvorčaść videa z padziei. Ale ž akazałasia, što padradčyki ŭsio jašče čakajuć tyja hrošy.

Hanna Kazłova, licenzijatka kanfierencyi i pradstaŭnica arhanizataraŭ, u fejsbuku raskazała pra situacyju vakoł hrošaj za kvitki. Žančyna piša, što Relivent atrymali za kvitki 84 tysiačy złotych (19,5 tysiačy jeŭra) — Hanna ŭdakładniła dla «Našaj Nivy», što na siońnia Relivent vinnyja jašče kala 66 tysiač złotych (15,3 tysiačy jeŭra).

Jašče da kanfierencyi Relivent całkam apłacili drukavanuju pradukcyju i zrabili dva nievialikija tranšy kampanii B'FORT, to-bok placoŭcy, dzie prachodziła padzieja. Reštu apłaty čakali na nastupny tydzień paśla kanfierencyi, ale ž užo ŭ kancy krasavika była zafiksavanaja pieršaja praterminoŭka.

Niekalki miesiacaŭ arhanizatary TEDx Ulica Mińska kamunikavali z kiraŭnikom Relivent biełarusam Paŭłam Ciščankam. Ciaham hetaha času Ciščanka šmat pieranosiŭ terminy apłaty, spasyłaŭsia na toje, što hrošy adpraŭlenyja, ale bank błakuje pieravod, źbiraŭsia pahasić zapazyčanaść pad ułasnyja harantyi. I ŭ siaredzinie lipienia pierastaŭ adkazvać arhanizataram kanfierencyi i padradčykam.

Hanna Kazłova pryznajecca, što pavodziny Relivent staviać arhanizataraŭ TEDx Ulica Mińska u ciažkaje stanovišča:

«Tyja hrošy, jakija źbirajucca za košt prodažu kvitkoŭ, iduć na apłatu vydatkaŭ padčas praviadzieńnia mierapryjemstva. Kali my nie možam apłacić niejkija vydatki za košt kvitkoŭ ci hrošaj partnioraŭ, my ich zakryvajem ułasnymi hrašyma. Tut takija sumy, jakija ja nie mahu zakryć ułasnymi hrašyma».

Choć niejkija hrošy paśla kanfierencyi pabačyŭ tolki adzin padradčyk — kampanija Slay Media, jakaja rychtavała videa z padziei. Jaje pradstaŭnik kaža, što apieratar kvitkoŭ musiŭ apłacić im videavytvorčaść, ale ž atrymać choć niejkija hrošy akazałasia składana:

«Pačalisia niejkija zatrymki pa apłacie, nieapraŭdanyja pieranosy. Potym pa prośbie samoha Relivent była padpisanaja damova z dakładna prapisanymi terminami apłaty, jakaja nie była vykananaja». 

Dalej Slay Media vyjšli na pramuju kamunikacyju ź Ciščankam:

«Jon dasyłaŭ niezrazumiełyja skrynšoty i abiacańni apłacić zaŭtra, ni razu nie davaŭ SWIFT-paćvierdžańniaŭ pieravodu. Paźniej ja vystaviŭ jamu dasudovuju pretenziju z patrabavańniem apłacić u siamidzionny termin usiu sumu doŭhu, u adkaz jon dasłaŭ raskład apłaty, padzieleny na čatyry častki, jaki jon taksama nie vykanaŭ. 

Adzinaje — na minułym tydni pryjšła čverć ad usioj sumy. Ale heta nie adpaviadaje ni jaho raskładu, ni našaj pretenzii, usie apłaty daŭno praterminavanyja».

U Slay Media kažuć, što Relivent pieravioŭ im kala 4 tysiač złotych, pry tym što ahulnaja suma doŭhu składaje 17 tysiač złotych. Ale ž na novyja vypłaty nie spadziajucca — pradstaŭnik kampanii raskazvaje, što Relivent vinny šmat kamu. Tym časam Ciščanka sam vystaviŭ dasudovuju pretenziju pradstaŭniku Slay Media, kab toj vydaliŭ publikacyju ŭ Threads pra jaho. 

U kamientary dla «Našaj Nivy» Pavieł Ciščanka pryznaŭ, što daŭhi jość:

«Paśla padziei zastalisia niepahašanyja abaviazacielstvy pierad asobnymi padradčykami. Kampanija nie admaŭlajecca ad svaich abaviazacielstvaŭ i pracuje nad tym, kab ich pahasić. Zatrymka raźlikaŭ źviazanaja ź finansavymi ciažkaściami kampanii».

Post pra Relivent vyjšaŭ 14 žniŭnia, to-bok pierad vychodnymi. Tamu, kaža Ciščanka, u Relivent płanujuć skłaści dalejšy płan dziejańniaŭ paśla vychodnych, niedzie 17‑18 žniŭnia.

Arhanizatary kanfierencyi hatovyja iści ŭ sud, kali tak i nie atrymajuć hrošaj i buduć mieć dastatkova padstaŭ dla suda. Niekali jany vyrašyli pracavać z Relivent, bo prysłuchalisia da rekamiendacyi adnaho z vałancioraŭ. 

Ciapier Hanna kaža, što zrabiła b pa-inšamu i pravieryła b infarmacyju pra Relivent zahadzia, a nie vieryła b rekamiendacyi:

«Ja vielmi škaduju, što my skarystalisia adnoj rekamiendacyjaj i nie sabrali źviestki. Napeŭna, spracavaŭ kredyt davieru, jaki ŭ nas usich jość da biełaruskich pradprymalnikaŭ i biełaruskich aktaraŭ. 

Padajecca, my ŭsie prajšli praz adno i toje ž, i dastatkova składana ŭjavić, što biełarusy buduć padmanvać adno adnaho. Dla mianie heta budzie vialikim i važnym dośviedam, bolš my tak rabić nie budziem. I mnie biaskonca škada tych, chto ad hetaha paciarpieŭ — našych padradčykaŭ, jakija siadziać biez hrošaj užo čatyry miesiacy».

• 0
• 1
• 2
• 1
• 0
• 0
• 2
• 0